काठमाण्डौ, १७ असार । चालु आर्थिक वर्षको ११ महिनामा मौसमी कामका लागि २ हजारभन्दा बढी नेपाली बेलायत गएका छन् । खासगरि कृषि क्षेत्रमा कामदार अभाव चुलिएपछि बेलायत सरकारले २०१९ बाटै अस्थायी रुपमा मौसमी कामदार लैजाने नीति कार्यान्वयन गरिएसँगै नेपालीहरू कामदारका रुपमा जाने क्रम पनि बढेको छ ।

त्यसरी जाने कामदारले तरकारी र फलहरू टिप्ने, टनेलभित्र काम गर्ने, सिँचाइ, प्याक हाउस, ट्र्याक्टर चलाउने, सुपरभाइजरको काम गर्नुपर्नेछ । १८ देखि ५० वर्ष उमेर समुहका कामदार मौसमी कामका लागि जान सक्छन् उनीहरूको शैक्षिक योग्यता मागिएको छैन भने साधारण अङग्रेजी बोल्नसक्ने भए मापदण्ड पुग्छ ।

सरकारले बेलायत जाने मौसमी कामदारलाई व्यवस्थित गर्न कार्यविधि बनाइरहेको बताएको छ । बेलायत पठाउन नेपालमा कुनै आधिकारीक म्यानपावर कम्पनी वा एजेन्ट नियुक्त गरिएको छैन तर कतिपय एजेन्टले आफु आधिकारीक भएको दावी गर्दै लाखाँै रुपैयाँ असुल्ने गरेका छन् ।

मौसमी कामदार भर्ना गर्ने अनुमति बेलायतस्थित प्रो फोर्स लिमिटेड, कोन्कोर्डिया लिमिटेड, एजी रिक्रुटमेन्ट एन्ड म्यानेजमेन्ट लिमिटेड र फ्रुटफुल जब्सले मात्रै दिएको छ । यी कम्पनीहरूले आफ्नो स्पोन्सरमा कामदार ल्याई माग भएको फार्ममा पठाउने गरेका छन् । ती कम्पनीहरूले कामदारको आवेदनकै आधारमा सिधै छनोट गर्ने गरेको जनाएका छन् ।

मौसमी कामदारको रुपमा जान चाहनेले कम्पनीको वेबसाइटबाट सिधै आवेदन दिन सक्नेछन् । आवेदन दिएको आधारमा छोटो सूची बनाई अन्तवार्ता गरि कामदार छनोट हुन्छ भने भिसाको आवेदन शुल्क र टिकटबाहेक अन्य खर्च कामदारले बेहोर्नुपर्दैन । साधारणतः कामदारको १ लाख ५० हजार रुपैयाँदेखि २ लाख ५० हजार रुपैयाँ लाग्ने गरेको छ ।

बेलायतको गृह मन्त्रालयका अनुसार सिजनल वर्किङ भिसामा गएका मौसमी कामदार एक वर्षभित्र जम्मा ६ महिनामात्रै बस्न पाउनेछन् । भिसाको अवधि समाप्त भएपछि आफ्नै देश फर्कनुपर्छ । अर्को रोजगारदातासँग काम गर्न पाइने छैन ।