गोरखा, २४ भदौ । गोरखाका पशुहरुमा लम्पिस्किन रोगको संक्रमण बढेको छ । व्यवसायिक रुपमा गाई तथा भैँसी पालन गरिएका ठाउँलगायत विभिन्न गाउँहरुमा लम्पिस्किनको संक्रमण बढेको भेटेरीनरी अस्पताल तथा पशु विज्ञकेन्द्रका प्रमुख ऋषि सापकोटाले जानकारी दिए ।

अहिले पालुङ्टार नगरपालिका, भीमसेन थापा गाउँपालिका र आरुघाट गाउँपालिकामा यो रोग फैलिएको छ ।

‘विशेषगरी पालुङ्टार नगरपालिका वडा नं. ७, वडा नं. ९ र वडा नं. १० मा यो रोगको संक्रमण फैलिएको छ’, सापकोटाले भने, ‘आरुघाट गाउँपालिका वडा नं. ८ र भीमसेन थापा गाउँपालिकामा पनि यो रोगको संक्रमण फैलिएको छ ।’ लक्षण सबै लम्पिस्किनसँग मिल्ने भएपनि नमूना परीक्षणको रिपोर्ट नआउञ्जेल किटान गरेर भन्न नमिल्ने उनले बताए ।

गतबर्ष तनहूँ र लम्जुङमा फैलिएको यो रोग बिगत १५ दिनदेखि गोरखामा फैलिएको हो ।

पालुङ्टारस्थित पशु स्वास्थ्य शाखाका प्रमुख रामप्रसाद देवकोटाका अनुसार वडा नं. ७, ९ र १० मा २० वटा गाई, गोरु यस रोगबाट संक्रमित छन् । वडा नं. ७ मा भने विज्ञकेन्द्रका प्रमुख लगायतको टोली गएर नमूना संकलन गरेका थिए ।

त्यस्तै भीमसेनथापा गाउँपालिकाका पशु स्वास्थ्य शाखाका प्रमुख नारायण भट्टराईका अनुसार वडा नं. १ को मसेल, वडा नं. ६ को अश्राङ, वडा नं. ७ र ८ को बोर्लाङमा यो संक्रमण फैलिएको छ । करिब १३ वटा पशुचौपायामा लम्पिस्किन फैलिएको उनले बताए ।

त्यस्तै आरुघाट गाउँपालिका ८ आरुपोखरीमा पनि यो संक्रमण फैलिएको त्यहाँका पशु स्वास्थ्य शाखाका प्रमुख इन्द्रहरि खनालले जनाए ।
विशेषगरी लामखुट्टे, डाँफे, भुसुनाको टोकाइ तथा सुई लगाउँने सिरिञ्जका कारण यो रोग फैलने हुँदा स्वास्थ्य सरसफाइका उपाय अपनाउन आग्रह गरिएको विज्ञकेन्द्रका प्रमुख सापकोटाले जानकारी दिए ।

यो रोग लागेपछि पशुचौपायाको शरीरभरि गिर्खा, गाँठागुँठी आउने, गिर्खा तथा गाँठागुँठी पाक्ने, फुटेर पानी तथा पिप बग्ने हुन्छ । त्यस्तै नाभी तथा माल सुन्निने, दुब्लाउँदै जाने, ज्वारो आउने समस्या हुन्छ । सबैभन्दा ठूलो समस्या दुधालु गाई, भैँसीको दूध सुक्ने विज्ञकेन्द्र प्रमुख सापकोटाले जानकारी दिए ।

संक्रमण फैलिएका सबै ठाउँमा उपचारको काम तीब्र रुपमा गरिएको पालिकाका पशु स्वास्थ्य शाखाले जानकारी दिएका छन् ।दरौदी दैनिकबाट