गण्डकी गाउँपालिका सहित गोरखाको ६ स्थानीय तहले आज निति, कार्यक्रम तथा बजेट ल्याउदै

इच्छाकामना न्युज

१०, आषाढ २०७८

गण्डकी गाउँपालिका सहित गोरखाको ६ स्थानीय तहले आज निति, कार्यक्रम तथा बजेट ल्याउदै

भुम्लिचोक, १० असार । गोरखाको गण्डकी गाउँपालिका सहित छ वटा स्थानीय तहले आज नीति तथा कार्यक्रम र आर्थिक वर्ष २०७८/७९ को बजेट ल्याउँदैछन् । असार १० गतेभित्र आउँदो वर्षको नीति कार्यक्रम बजेट ल्याउनुपर्ने प्राबधान छ ।

जस अनुसार यस वर्ष गण्डकी गाउँपालिकाले समयमै नीति कार्यक्रम बजेट ल्याउन लागिएको गाउँपालिकाका प्रमुख प्रशासकिय अधिकृत पुरन गुरुङले जानकारी दिए। गण्डकी गाउँपालिकामा गत वर्ष केन्द्र विवादका कारण समयमै गाउँसभा गर्न सकेका थिएनन्।

आज नीति, कार्यक्रम र बजेट ल्याउने अन्य पालिकाहरुमा गोरखा नगरपालिका, पालुङटार नगरपालिका, भीमसेन थापा गाउँपालिका, सिरानचोक गाउँपालिका, बारपाक सुलिकोट गाउँपालिका र धार्चे गाउँपालिका छन् ।

अजिरकोट गाउँपालिकाले नीति कार्यक्रम ल्याईसकेको छ भने बजेट बिहिवार ल्याउने जनाएको छ । शहीदलखन गाउँपालिकाले नीति कार्यक्रम र बजेट बुधवार नै ल्याईसकेको छ भने आरुघाट र चुमनुब्री गाउँपालिकाले ल्याउन बाँकी छ । चुमनुब्री गाउँपालिकाले एक साताभित्र नीति कार्यक्रम र बजेट ल्याउने गरी तयारी गरिरहेको जनाएको छ ।

आरुघाट गाउँपालिकाले सबै तयारी पूरा गरेको र अध्यक्ष पूर्ण दाहाललाई कोरोना संक्रमण देखिएकाले केहीदिन पर धकेलिएको प्रमुख प्रशासकीय अधिकृत एकदेव खनालले बताए ।

बिहिवार बजेट ल्याउन तयारी गरेका स्थानीय तहमा बुधवार दिनभर कार्यपालिका बैठक भएका थिए । बजेट तथा योजनामा छलफल भएको स्थानीय तहका प्रमुखहरुले बताएका छन् ।