मुग्लिन । चितवन मुग्लिनका महिलाहरुले साबुन उद्योग सञ्चालन ल्याएका छन् । सिर्जनशिल महिला जागरण केन्द्र इच्छाकामनाका १५ जना महिलाहरुले मुग्लिनमा झोल साबुन उद्योग सञ्चालनमा ल्याएका हुन् । 

उक्त उद्योगको गाउँपालिका अध्यक्ष दान बहादुर गुरुङले एक कार्यक्रमकाबिच  उद्घाटन गर्नुभयो ।  उद्योगको उद्घाटन गर्दै गाउँपालिका अध्यक्ष दान बहादुर गुरुङले सिकेको सीपलाई  व्यवहारमा लागु गरेकोमा सिर्जनशिल महिला जागरण केन्द्र मुग्लिनलाई धन्यवाद र सफलताको शुभकामना दिनुभयो ।  उहाँले  उद्योगका लागि आवश्यक सहयोग गाउँपालिकाले  गर्ने प्रतिवद्धता व्यक्त गर्नुभयो ।  गाउँपालिकाको कार्यालयमा  यही उद्योगबाट उत्पादन भएका  साबुन प्रयोग गर्ने पनि प्रतिवद्धता  जानउनुभयो । सिर्जनशिल महिला जागरण केन्द्रले स्थापना कालदेखिनै उदाहरणीय काम गर्दै आएको उहाँको  भनाई छ । 

गाउँपालिका निर्वतमान अध्यक्ष गीता कुमारी गुरुङले सामुहिक रुपमा लागनी गरि उद्योग सञ्चालन गर्न आग्रह गर्नुभयो । उहाँले सिर्जनशिल महिला जागरणल केन्द्रको एकता विश्वास र परिश्रमले उदाहरणीय संस्था बन्न सफल भएको  बताउनुभयो ।  तालिम लिएर मात्र नभई व्यवहारमा लागुपर्नेमा जोड दिनुभयो । 

होटल संघ मुग्लिनका अध्यक्ष  मिन बहादुर श्रेष्ठले होटलहरुमा स्थानिय उत्पादन प्रयोगमा जोड दिइने बताउनुभयो । उहाँले यहाँबाट उत्पादन हुने साबुनको प्रयोग गर्ने प्रतिवद्धता व्यक्त गर्दै गुणस्तरमा ध्यान दिन आग्रह गर्नुभयो ।  

कार्यक्रममा सिर्जनशिल महिला जगारण केन्द्र इच्छाकामना मुग्लिनका अध्यक्ष सावित्री पुडासैनी खनालले महिलाहरुलाई आत्मनिर्भर बनाउन तालिमलााई सदुपयोग गर्दै साबुन उद्योग सञ्चालनमा ल्याएको  बताउनुभयो ।  उहाँले उद्योगको बजारीकरणका  लागि सबैको साथ र सहयोग मिलने विश्वास व्यक्त गर्नुभयो ।

कार्यक्रममा  गाउँपालिका प्रवक्ता  तथा  वडा नम्बर ३ का वडाध्यक्ष नर बहादुर नेपाल ,उद्यमशिल महिला जागरण केन्द्र इच्छाकामनाका अध्यक्ष अप्सरा पौडेल, महिला सञ्जालका अध्यक्ष राधा कडेल, तामिन कृषि सहकारीका अध्यक्ष हरि बहादुर नेपाल  लगायतले शुभकामना मन्तव्य राख्नुभएको थियो ।  

सो अवसरमा  झोल साबुन, हार्पिक र फिनेल बनाउने १५ दिने तालिमको पनि  समापन गरिएको छ ।  प्रदेश सरकार समाजिक मन्त्रालय हेटौँडाको आर्थिक सहयोगमा सम्पन्न १५ दिने तालिमको  समापन गरिएको छ ।  सिर्जनशिल महिला जागरण केन्द्रका अध्यक्ष सावित्री पुडासैनी खनालको सभापतित्व तथा गाउँपालिका अध्यक्ष दान बहादुर गुरुङको प्रमुख आतिथ्यतामा समापन कार्यक्रम सम्पन्न भएको हो । सरिता सुवेदीले स्वागत मन्तव्य राख्नुभएको कार्यक्रम शान्ति सुनारले सञ्चालन गर्नुभएको थियो ।  सहभागीको तर्फबाट भने सपना अधिकारीले मन्तव्य राख्नुभएको थियो ।