चितवन, १५ साउन । जिल्लामा कोभिड– १९ का सक्रिय संक्रमितको संख्या दुई हजार नाघेको छ । स्वास्थ्य कार्यालय चितवनका अनुसार जिल्लामा अहिले दुई हजार ३० सक्रिय संक्रमित छन् । गत असार १३ गते १ हजार १४ मा झरेको संक्तमित यही साउन १४ मा आइपुग्दा बढेर दुई हजार ३० पुगेको हो ।

कार्यालयका अनुसार पछिल्ला केही दिनमा संक्रमितको संख्यम बढ्दै गएको छ । गत वैशाख र जेठमा यहाँ सक्रिय संक्रमितको संख्या उच्च पुगेको थियो । जेठ १० गते संक्रमितको संख्या ४ हजार ७ सय १३ पुगेको थियो ।

असार लागेसँगै घट्दै गएको संक्तमितको संख्या पुनः बढ्न थालेको छ । असार १ गते १ हजार ५ सय ४८ रहेको संक्रिय संक्तमितको संख्या घट्दै गएर असार १३ गते १ हजार १४ मा झरेको थियो । कार्यालयका जनस्वास्थ्य अधिकृत गीताञ्जली ढकालका अनुसार असार १४ गते १ हजार ८७, १६ गते १ हजार १ सय ९८, १८ गते १ हजार २ सय २० हुँदै असार २३ गते १ हजार २ सय ७१ पुगेको थियो । उनका अनुसार असार १२ गतेदेखि साउन १३ गतेसम्म आइपुग्दा नयाँ संक्तमित मात्र १ हजार ३४ थपिएका छन् ।

संक्रिय संक्तमितको प्रतिशत पनि बढ्दै गएको छ । कार्यालयका निमित्त प्रमुख अमृत महर्जन निषेधाज्ञा खुकुलो हुँदै जाँदा संक्तमित बढ्दै गएको जानकारी दिए । उनले भने ‘राम्रोसँग संक्रमितको संख्या घट्न नपाउँदै पुनः बढ्न थालेपछि कोरोनाको जोखिम बढेको छ ।’ कोरोना नियन्त्रणका लागि अहिले खोपको अभियान जारी रहेको जनाउँदै उनले कारोना संक्तमण बढ्दै गएकाले सबै सजग रहन आग्रह गरे ।

जिल्लामा रहेका संक्तमित मध्ये १ सय १६ का अस्पतालमा उपचार भइरहेको छ । नौ सार्वजनिक आइसोलेसनमा र १ हजार ९ सय ५ होम आइसोलेसनमा छन् । जिल्लामा हालसम्म ३ सय २७ को मृत्यु भएको छ । कूल संक्रमित संख्या २० हजार ९० पुगेको छ ।

जिल्लाका अस्पतालमा बाहिरी जिल्लाका समेत गरी २ सय १३ को उपचार भइरहेको छ । ती मध्ये ७५ सघन उपचार कक्षमा, १२ भेन्टिलेटरमा, ५० एचडियूमा र ८८ सामान्य श्ययामा उपचाररत छन् ।