सुसिला श्रेष्ठ, काठमाडौं, १५ बैशाख । सङ्क्रमण फैलिन थालेपछि गतवर्षको वैशाखमा बीमा समितिले कोरोना स्वास्थ्य बीमा निर्देशिका जारी गर्दै कोरोना बीमा सुरु गरेको थियो । त्यसै अनुसार बीमा गरेकाहरुले आवश्यक कागजात पु¥याएर भुक्तानी गरेपनि महिनौ देखि बीमा रकम पाउन सकेका छैनन् ।

काठमाडौं नक्सालका अनिता कुमारी घिमिरेलाई सात महिना अघि कोरोना सङ्क्रमण भएको थियो । गत साउनमै कोरोना बीमा गर्नुभएका उहाँले सङ्क्रमण भईसकेपछि सबै प्रक्रिया पूरा गरेर बीमा भुक्तानी दावी गर्नुभयो । तर उहाँले कोरोना बीमा बापतको रकम अझै पाउनुभएको छैन ।

बेलका नगरपालिका उदयपुरका जानुका कार्की नगरपालीका कै मनोविमर्शकर्ता हुनुहुन्छ । कोरोना सङ्क्रमण फैलिरहेका बेला क्वारेन्टिनमा र आइसोलेसनमा रहेका सङ्क्रमितलाई भेटेर मनोपरामर्श सेवा प्रदान गर्दै गर्दा उहाँ पनि सङ्क्रमित बन्नुभयो । उहाँले पनि गत असोजमै कोरोना बीमा रकम भुक्तानीको लागि कागतजात पेश गरिसक्नु भयो तर अहिले सम्म रकम पाउनु भएको छैन ।

काठमाडौं उपत्यका प्रशारण मञ्च काठमाडौंले उपत्यकामा सञ्चालित सबै रेडियोका १०/१० जनाको कोरोना बीमा गरेको थियो । ३६ जना कोरोना सङ्क्रमित भएकोमा १२ जनाले मात्रै बीमा रकम पाएका छन् ।

बीमा समिति नेपालको चैत्र महिनासम्मको तथ्याङ्क अनुसार कोरोना बीमा रकम दावी गर्नेहरु मध्ये ९१ हजार ६ सय ७३ जनाको आवश्यक कागजात पुगेको छ । जसमध्य ६० हजार ५ सय ८७ जनाको लागि ५ अर्ब ८५ करोड १५ लाख बराबरको रकम भुक्तानी गरिएको छ ।

कागजात पुरा भएर पनि ३१ हजार बढिको रकम भुक्तानीमा किन ढिलाई भईरहेकोबारे बीमा समितिका अध्यक्ष सूर्य प्रसाद सिलवालले बीमा गर्ने कम्पनीले बीमाको रकम भुक्तानि गर्ने भन्दै केही ढिलाई भएको बताउनुभयो ।

उहाँले आफ्नै कोषबाट भएपनि बीमाको रकम भुक्तानि गर्न बीमा कम्पनीलाई भनेको र सरकारबाट बजेट आएपछि रकम उपलब्ध गराउने जानकारी दिनुभयो ।

सरकारले बीमा कम्पनीसँगको सम्झौता अनुसारको रकम नदिएका कारण कोरोना बीमाको रकम भुक्तानीमा ढिलाई भईरहेको कम्पनीहरु बताएका छन् ।