कुरिनटार । जेनजी आन्दोलनको क्रममा अराजक समूहले जलाएको २ वटा गाडीको बिमा बापतको रकम चितवनको इच्छाकामना गाउँपालिकालाई हस्तान्तरण गरिएको छ । बिमा कम्पनी प्रोटेक्टिभ माइक्रो इन्स्योरेन्स भरतपुर ले शनिबार गाउँपालिकालाई बिमा बापतको रकम ३७ लाख ६५ हजार रुपैयाँ हस्तान्तरण गरेको हो । 

गत भदौ २३ र २४ गतेको जेनजी आन्दोलनका क्रममा आन्दोनकारीहरुले  गाउँपालिकाको एक स्कर्पियो, एक बलेरो जीप र एक मारुती गाडी जलाएका थिए । पूर्ण रुपमा जलेको उक्त तीन गाडी मध्य २ वटा गाडीको पूर्ण बिमा रहेकोमा सोही गाडीको क्षतिपूर्ती स्वरुप बीमा रकम गाउँपालिका अध्यक्ष दान बहादुर गुरुङलाई चेक मार्फत हस्तान्तरण गरिएको प्रोटेक्टिभ माइक्रो इन्स्योरेन्स भरतपुर शाखाका प्रबन्धक कुमार उप्रेतीले बताए । चेक हस्तान्तरणको क्रममा यस बीमा कम्पनीले सहज ढंगले जतिसक्दो  छिटो बीमा वापतको रकम उपलब्ध गराउँदै सेवालाई प्रभावकारी बनाउने प्रयास गरिरहेको पनि उनले बताए ।  

यस्तै बिमा रकम वापतको चेक ग्रहण गर्दै गाउँपालिका अध्यक्ष दान बहादुर गुरुङले भष्ट्रचार अन्त्य  र सुशासनका लागि जेनजीहरुले पवित्र उद्देश्यका साथ गरेको आन्दोलनमा खराब प्रवृति भएका व्यक्ति समूहहरुले सरकारी सम्पतिको बिनास गरेको बताए। आन्दोलनपछि कार्यालयहरु ध्वस्त हुदाँ र केन्द्रबाट बजेट नआउँदा  विकास निर्माणका कामहरुमा बाधा पुगेको उनको भनाई छ । साथै उनले प्रोटेक्टिभ माइक्रो इन्स्योरेन्सले बीमा वापतको रकम चाडैँ उपलब्ध गराएकोमा धन्यवाद दिए । 

चेक हस्तान्तरण कार्यक्रममा गाउँपालिका उपाध्यक्ष माया सिलवाल, गाउँपालिका प्रवक्ता एवं वडा नम्बर ३ का वडाध्यक्ष नर बहादुर नेपाल, वडा नम्बर ४ का वडाध्यक्ष रुद्रप्रसाद उप्रेती सहितको जनप्रतिनिधि र कर्मचारीहरुको उस्थिति रहेको थियो ।