काठमाडौं, २६ असोज ।  गुरुङसमुदायको पुख्र्यौली पेशा जस्तै बनेको छ, लाहुरे । त्यो परम्परालाई तोडेका गुरुङसमुदायका सीमित व्यक्तित्वहरुले व्यापार र व्यवसायमा पनि सफलता हात पारेका छन् । 
गुरुङसमुदायका ती नै सफल व्यक्तित्वहरु युवालाई व्यापार र व्यवसायमा विकल्प खोज्न सुझाव दिन्छन् । त्यसका लागि कडा परिश्रम र धैर्यता आवश्यक पर्ने उनीहरुको सुझाव छ । 
भाटभटेनी सुपर मार्केटका सञ्चालक मिनबहादुर गुरुङ आफ्नै कामले सिकेर अघि बढ्नुपर्ने बताउँछन् । ‘मान्छेलाई कामले नै सिकाउने हो । सिक्दै अघि बढ्नुपर्दछ’, उनी भन्छन् । 
अन्तर्राष्ट्रिय तमू परिषद्को आयोजनामा जारी दोस्रो अन्तर्राष्ट्रिय तमू (गुरुङ) सम्बाद शृंखलाको अन्तिम दिन सोमबार पहिलो सेसनमा यी सफल व्यवसायीले आफ्नो अनुभव बाढेका हुन् । उनले व्यवसाय सुरु गर्दा धेरै चुनौतीको सामना गर्नु परेको पनि सुुनाए । 
‘गुरुङसमुदायबाट यस्तो व्यापार व्यवसायमा कोही थिएन । एक्कासी मैले सुरु गर्दा को आयो कहाँबाट आयो भनेर होला धेरैले समस्या सिर्जना गर्ने प्रयास गरे । नक्कली सामान बेच्योसम्म भन्न आए’, उनी भन्छन्, ‘तर, चुनौतीको सामना गरेर अघि बढ्नु पर्दछ । तपाई इमान्दार हुनुपर्दछ । कडा मेहनत गर्नुपर्दछ । सफलता प्राप्त हुने छ ।’
श्रीमतीको गहना बेचेर ३६ वर्षअघि थोरै पूँजीले भाटभटेनीको सुरुवात गरेका उनी आफ्नो यही मन्त्र पछ्याउँदा सफलता मिलेको सुनाउँछन् । 
गुरुङसमुदायका अर्का सफल व्यवसायी जापान मनी एक्सप्रेसका अध्यक्ष ओम गुरुङले आफ्नो क्षमता हेरेर त्यसअनुसार व्यापार व्यवसाय रोज्न सुझाव दिनुभयो । ‘धेरैले अरुले गरेको हेरेर त्यस्तै गर्न खोज्छन् । यस्तो व्यवहारले केहीलाई त सफलता देला तर धेरैलाई फाइदा गर्दैन’, जापानबाट ओमले भने, ‘पहिला आफ्नो क्षमता हेर्नुहोस् । तपाईमा के खुबी छ? त्यसअनुसार आफ्नो व्यवसाय रोज्नुहोस् । त्यसले तपाईलाई सफलता दिने छ ।’
आफ्नो काममा पूर्ण विश्वास गरेर अघि बढ्न उनको सुझाव छ । ‘तपाईले केही कामको सुरुवात गर्न थाल्नुभयो भने कसैले विश्वास गर्दैन । हाम्रो समुदायमा यस्तै संस्कार छ’, उनी भन्छन्, ‘पहिलो कुरा तपाईले सुरुवात गर्नुभएको काममा पूर्ण विश्वास गरेर अघि बढ्नुहोस् । आफूले कुनै गल्ती गरेको छैन भन्ने निश्चत गर्नुहोस् र त्यो कुरामा परिवारलाई मनाएर अघि बढ्नुहोस् । सफलता मिल्ने छ ।’
बेलायत बसाई त्यागेर नेपालमै व्यवसाय गर्न फर्किएका गण्डकी रेन्बो ट्राउटका सञ्चालक लक्षिन गुरुङको अनुभव पनि उस्तै छ । उनी नेपालमा धेरै गर्न सकिने बताउँछन् । व्यवसायमा सफलता प्राप्त गर्नका लागि भने बजारीकरण गर्न र धैर्यता राख्न सक्नु पर्ने उनको सुझाव छ । 
‘व्यवसाय सुरु गरेपछि आजको भोली नै सफलता प्राप्त हुन्छ भन्ने पनि छैन । यसका लागि कडा मेहनत त गर्नुनै पर्छ । त्यसका साथै धैर्यता पनि कायम गर्न सक्नुपर्दछ’, उनी भन्छन्, ‘त्यसका साथै आफ्नो उत्पादनको बजारीकरण गर्न जान्नुपर्दछ । त्यसले नै आफ्नो व्यवसायलाई सफल बनाउने छ ।’ बजारीकरण गर्न नजान्दा आफूले सुरुवातमा समस्या व्यहोर्नुपरेको सुनाए ।