तेह्रथुमको छथर गाउँपालिकामा रहेको मार्गा पोखरी ओझेलमा पर्दै

विकाश गुरुङ

९, फाल्गुण २०७७

तेह्रथुम, ७ फागुन । पुर्वी पहाडी जिल्ला तेह्रथुमको छथर गाउँपालिकामा रहेको मार्गा पोखरी ओझेलमा पर्दै गएको छ । त्यहा पुग्ने जोकोहिको मनमस्तिष्कमा पोखरीको सुन्दरताले छाप छोड्छ । तर उचित संरक्षण र प्रचारप्रसार नहुदा यो पोखरी ओझेलमा परेको छ । समुन्द्र सतहबाट २४ सय ५० मिटर उचाईमा रहेको यो पोखरी संरक्षणमा सरोकारवालाहरुको नजर नपुग्दा ओझेलमा परेको हो ।
छथर गाउँपालिकाको वार्ड नम्बर १ को शिरमा रहेको धार्मिक तथा पर्यटकीय हिसाबले महत्तपूर्ण मार्गा पोखरीप्रति नागरिकको विश्वास भने घटेको छैन । करिब ५ सय मिटर लम्बाईमा फैलिएको मार्गा पोखरीको उत्पत्तिको बिषयमा यकिन साथ आजसम्म कसैले पनि बताउन सकेको छैन । पोखरी वरिपरि विभिन्न प्रजातिका बोट बिरुवा भए पनि पात खसेको देखिदैन । छथर गाउँपालिका १ डोङडोङगेका का स्थानीय फुर्ब शेर्पा यहाँ पात खस्ने बित्तिकै चरो आएर बाहिर फाल्ने गरेको बताउनुहुन्छ ।
मार्गा पोखरी ऐतिहासिक छथर क्षेत्रकै उत्कृष्ट पर्यटकीय संभावना भएर पनि उचित संरक्षण नहुँदा बर्सेनि सुक्दै गएको छ । छथर गाउँपालिकाले भने पोखरीमा पर्यटन प्रबर्द्धन गर्नको लागि बिशेष योजना बनाएर अगाडि बढेको गाउँपालिकाका प्रवक्ता राजन नेपालीले जानकारी दिनुभयो । हरेक वर्षको भाद्र पूर्णिमाको अवसरमा यहाँ पूजा र मेलासँगै बिजुवा गुफा समेत बस्ने गरिएको छ । खडेरीको मौसममा तेह्रथुम, धनकुटा लगायतका गाउँबाट मार्गा पोखरीमा पानी माग्न आउने परम्परा पनि रहेको छ ।