नयाँ आर्थिक वर्ष सुरु हुदाँ पनि चितवनको राप्ती नगरपालिकाले बजेट पास गर्न सकेन

इच्छाकामना न्युज

२, श्रावण २०८१

नयाँ आर्थिक वर्ष सुरु हुदाँ पनि चितवनको राप्ती नगरपालिकाले बजेट पास गर्न सकेन

चितवन । राप्ती नगरपालिकाको नगर प्रमुखको असक्षमताका कारण अहिलेसम्म बजेट पास भएको छैन । असार मसान्त भित्रै बजेट ल्याउन नसकेपछि राप्तीमा ‘बजेट होलिडे’ भएको छ ।

स्थानीय सरकार सञ्चालन ऐन, २०७४ को दफा ७१ को उपदफा (१) र (५) अनुसार स्थानीय तहको सभामा बजेट पेस हुनुपर्ने र सोही दफाको उपदफा (६) बमोजिम असार मसान्तभित्र सभाबाट पारित गरिसक्नुपर्ने व्यवस्था छ ।

त्यसरी बजेट पारित हुन नसकेका स्थानीय तहले साउन १ गतेबाट एक रुपैयाँ पनि खर्च गर्न मिल्दैन । अर्थात्, बजेट होलिडे हुन्छ । सबैलाई मिलाएर लैजाने क्षमता नगर प्रमुखमा हुनुपर्छ । नगर प्रमुखले एमाले र कांग्रेसबाट निर्वाचित जनप्रतिनिधिको कुरै नसुन्दा राप्तीमा पटक–पटक जनप्रतिनिधिबीच विवाद हुँदै आएको छ । यहाँका नगर प्रमुख शमशेर लामा नेकपा (एकिकृत समाजवादी)बाट निर्वाचित भएका हुन् ।

नगर प्रमुखको कार्यशैलीकै कारण पालिकाको काम कारबाही प्रभावित हुने गरेको छ । धेरै भन्दा धेरै जनाको कुरा सुनेर सके सर्वसम्मत नभए बहुमतबाट भएपनि काम कारबाही अगाडि बढाउन सक्ने गुण नेतृत्वमा हुनुपर्छ । राप्ती नगर प्रमुखमा उक्त गुण नहुँदा जिल्लाका सात वटा पालिकामध्ये सबैभन्दा कमजोर यहि पालिका बनेको छ ।

चितवनको राप्ती मात्र नभई देशभरका ४९ पालिकामा बजेट होलिडे भएको छ । गाउँपालिका राष्ट्रिय महासंघका अनुसार आर्थिक वर्ष २०८१/८२ सुरु भइसक्दा पनि ३६ गाउँपालिकाले बजेट ल्याउन सकेका छैनन् ।