सवारी ज्यान मुद्दामा फरार आँबुखैरेनी भाँगेका चन्द्रसिंह मगर सहित ५ जना फरार प्रतिवादी पक्राउ

इच्छाकामना न्युज

३१, भाद्र २०७८

सवारी ज्यान मुद्दामा फरार आँबुखैरेनी भाँगेका चन्द्रसिंह मगर सहित ५ जना फरार प्रतिवादी पक्राउ

तनहुँ, ३१ भदौ । जिल्ला प्रहरी कार्यालय तनहुँले सवारी ज्यान मुद्दामा सजाय तोकिएका आँबुखैरेनी गाउँपालिका ४ भाँगेका २८ वर्षीय चन्द्रसिंह मगरलाई पक्राउ गरेको छ। उनलाई जिल्ला अदालत तनहुँले विसं २०७५ असोज १७ गते ११ महिना सात दिन कैद र ४ हजार जरीवानाको फैसला सुनाएको थियो।

उनीसँगै विभिन्न मुद्दामा सजाय पाएका ५ जना फरार प्रतिवादीलाई प्रहरीले पक्राउ गरेको छ । सवारी ज्यान, सामाजिक अपराध र सम्बन्धविच्छेद मुद्दामा अदालतबाट कैद तोकिएका प्रतिवादीलाई प्रहरीले पक्राउ गरेको हो ।

सवारी ज्यान मुद्दामै शुक्लागण्डकी नगरपालिका ८ का ३१ वर्षीय सुकबहादुर दमैलाई पक्राउ गरेको छ। उनलाई जिल्ला अदालतले विसं २०७८ वैशाख ५ गते दुई वर्ष दश महिना नौ दिन कैदको फैसला सुनाएको थियो ।

सामाजिक अपराध मुद्दामा गोरखा पालुङटार नगरपालिका ७ का ३९ वर्षीय विशालजङ्ग शाही भन्ने जुननारायण विश्वकर्मालाई पक्राउ गरेको छ। उनलाई जिल्ला अदालतले विसं २०७७ फागुन २६ गते एक महिना कैद र रु दुई हजार दुइ सय जरीवानाको फैसला सुनाएको थियो।

यसैगरी सम्बन्धविच्छेद र सवारी ज्यान मुद्दामै एक एक प्रतिवादी पक्राउ गरिएको प्रहरी नायब उपरिक्षक युवराज तिमिल्सिनाले जानकारी दिए । पक्राउ परेका सबैलाई कैद भुक्तानका लागि आजै तनहँु अदालत उपस्थित गराइएको उनले बताए ।

विभिन्न अपराध एवं मुद्दाहरुमा संलग्न रही फरार रहेका तथा सम्मानित अदालतबाट फैसला भई दण्ड, जरिवाना, दसौदी, कोर्ट फि र सरकारी बिगो समेत तिर्न बाँकी भएका व्यक्तीहरुको खोजीकार्यलाई तीव्र पारिएको प्रहरीले जनाएको छ ।