दमौली । तनहुँको देवघाट गाउँपालिका–२ नरममा आयोजित टोलस्तरीय पुरुष भलिबल प्रतियोगितामा व्यास नगरपालिका–११, बेनीकोटस्थित लालीगुराँस युवा क्लब ‘ए’ प्रथम भएको छ। २९ टोली सहभागी प्रतियोगितामा देवघाट गाउँपालिका–३ गोन्द्राङ ‘ए’ दोस्रो भएको छ।

नरम टोल विकास संस्थाको आयोजनामा सञ्चालित प्रतियोगितामा प्रथम भएको लालीगुराँस युवा क्लब ‘ए’ ले नगद ५० हजार रुपैयाँसहित ट्रफी र मेडल प्राप्त गरेको छ। त्यस्तै, दोस्रो भएको गोन्द्राङ ‘ए’ ले नगद ३० हजार रुपैयाँ र मेडल प्राप्त गरेको छ। प्रतियोगितामा बुलिङटार गाउँपालिका, बुलिङटार ‘ए’ तृतीय भएको छ। उसले नगद २० हजार रुपैयाँ र मेडल प्राप्त गरेको छ। बेनीकोटका कुशल श्रेष्ठ उत्कृष्ट खेलाडी घोषित हुँदै नगद दुई हजार रुपैयाँ र ट्रफी प्राप्त गरेका छन्।

प्रतियोगिताका प्रथम पुरस्कारका लागि देवघाट–५ का समाजसेवी अर्जुन अधिकारी र देवघाट–१ का समाजसेवी तुलबहादुर गुरुङले जनही २५ हजार रुपैयाँ सहयोग गरेका थिए। दोस्रो पुरस्कार देवघाट–५ का युवा व्यवसायी तथा समाजसेवी सुकु गुरुङ र तेस्रो पुरस्कार देवघाट–२, नरम निवासी यातायात व्यवसायी ढकबहादुर थापाले सौजन्य गरेका थिए। प्रतियोगिताको समापन समारोहमा देवघाट–२ का वडाध्यक्ष मिनबहादुर राना, समाजसेवी अर्जुन अधिकारी, देवघाट खेलकुद समितिका अध्यक्ष अमर फेवालीमगर, नरम टोल विकास संस्थाका अध्यक्ष पूर्णसिंह मगरलगायतको उपस्थिति रहेको थियो।

भलिबल प्रतियोगितासँगै आयोजित सांस्कृतिक कार्यक्रममा राष्ट्रिय कलाकार सम्झना लामिछाने मगर, गायक अमर रजाली मगर तथा स्थानीय कलाकारहरूले सांगीतिक प्रस्तुति दिएका थिए। स्थानीयस्तरमा खेलकुदको विकास, युवाबीच आपसी सद्भाव र एकता अभिवृद्धि तथा कला संस्कृतिको संरक्षण र प्रवर्द्धन गर्ने उद्देश्यले प्रतियोगिता आयोजना गरिएको आयोजकले जनाएको छ।