मुग्लिङ-नारायणगढ दुर्घटना अपडेट : २१ जना घाइते

इच्छाकामना न्युज

१, कार्तिक २०८२

मुग्लिङ-नारायणगढ दुर्घटना अपडेट : २१ जना घाइते

चितवन । नारायणगढ–मुग्लिङ सडकखण्ड अन्तर्गत भरतपुर महानगरपालिका–२९ गाईघाटमा सवारी दुर्घटना हुँदा घाइते हुनेको सङ्ख्या २१ पुगेको छ। जिल्ला प्रहरी कार्यालय चितवनका अनुसार शनिबार बिहान ७ वटा सवारीसाधन एकअर्कासँग ठोक्किएर दुर्घटना भएको थियो ।

भरतपुर महानगरपालिका–२९ स्थित गाईघाटमा मुग्लिनबाट नारायणगढतर्फ आइरहेको ना ८ ख ६६२९ नम्बरको ट्रक र विपरीत दिशाबाट जाँदै गरेको बा ४ ख ७४२० नम्बरको बस ठोक्किएका थिए।

त्यस बसको पछाडि लस्करै रहेका ना ७ ख ९६०७ नम्बरको टेलर, बा.प्र. ०६-००१ ग ०४८४ नम्बरको विद्युतीय माइक्रो, ग. २ ख. १६२६ नम्बरको बस, त्यसपछाडिको ना. ३ च. ३२५६ नम्बरको बलेरो र बि ए बि ८४७० नम्बरको भारतीय कार ठोक्किन पुगेको जिल्ला प्रहरी कार्यालय चितवनले जानकारी दिएको छ।

घाइतेको उपचारका लागि भरतपुरका विभिन्न अस्पतालमा पठाइएको छ। अहिलेसम्म नेशनल सिटी अस्पतालमा १३ जना, नयाँ मेडिकल कलेज भरतपुरमा ४ जना र जनता केयर अस्पतालमा ४ जनाको उपचार भइरहेको प्रहरीले पनि जानकारी दिएको छ।

अझै घाइतेको सङ्ख्या थपघट हुने सम्भावना रहेको जिल्ला प्रहरी कार्यालय चितवनका प्रमुख गोविन्द पुरीले जानकारी दिए। उनको अनुसार घटनाको थप विवरण अझै आउन बाँकी छ। अहिले नारायणगढ–मुग्लिन सडकखण्ड पूर्णरूपमा अवरुद्ध रहेको छ।