चितवन । वाग्मती प्रदेशका स्वास्थ्यमन्त्री किरण थापामगरले चितवन जिल्लालाई स्वास्थ्य क्षेत्रको हबको रुपमा विकास गर्न सकिने बताएका छन् । चितवन मुलुकको मध्यभागमा रहेको र राजधानीसँगै जोडिएकाले मेडिकल हब बनाउन सके वाग्मती प्रदेशका जनतामात्रै नभईसँगै जोडिएका प्रदेशका नागरिकलाई पनि सेवा दिन सकिने उनले बताए ।

कान्तिपुर मिडिया ग्रुपले बिहीवार चितवनमा आयोजना गरेको ‘चितवन चिन्तन’को तेस्रो सत्र शिक्षा र स्वास्थ्यमा लगानीः चितवनको चिनारी विषयक कार्यक्रममा बोल्दै मन्त्री मगरले यस्तो बताएका हुन् । ‘वाग्मती प्रदेशको ६१ लाख जनसंख्यामध्ये चितवनमा मात्रै ७ लाख जनसंख्या बसोबास गर्छन् ।

विकासका पूर्वाधार, हावापानी, कृषि, पर्यटन, उद्योग, स्वास्थ्यलगायत क्षेत्र दिनप्रतिदिन बढेको छ, नयाँ बस्तीको विकास हुने क्रम जारी छ,’ मन्त्री मगरले भने, ‘चितवनमा निजी, सरकारी र स्थानीय तहबाट ८ वटा अस्पताल सञ्चालनमा छन् । ४ वटा ठूला अस्पताल छन्, शैक्षिक अस्पताल पनि छन् । त्यसकारण चितवन स्वास्थ्य हब बनाउन उचित छ । सरकारी र निजी अस्पतालको स्तरउन्नती गर्न हामी लाग्नेछौं ।’

शिक्षा र स्वास्थ्य क्षेत्रलाई व्यवस्थित गर्न वाग्मती प्रदेश सरकारबाट शिक्षा स्वास्थ्य ऐन २०८१ संशोधित पास गरेको बताए ।

‘ऐनअनुसार अब वाग्मती प्रदेशमा कम्तीमा १०० बेड सञ्चालन भएका अस्पतालले नर्सिङ पठाउन सकिन्छ । ऐन पास गरिराख्दा चितवनकै वाग्मती प्रदेश सरकारबाट सञ्चालित बकुलहर अस्पताल ५० बेडको थियो । वाग्मती प्रदेश सरकारको सहयोगमा १०० बेडमा सञ्चालनमा आएको छ,’ उनले भने, ‘आवश्यक थप बेड, उपकरण, पूर्वाधारहरु तयार पार्दैछौं । अन्य निजी अस्पतालको पनि स्तरोन्नति हुँदैछ ।’