घैरुङ । गोरखाको शहिद लखन गाउँपालिका स्थानीय तह संस्थागत क्षमता स्वमूल्याङ्कन नतिजामा जिल्लामै सर्वोत्कृष्ट पालिका बनेको छ । संघिय मामिला तथा सामान्य प्रशासन मन्त्रालयले सार्वजनिक गरेको आर्थिक बर्ष २०७९।०८० को स्थानीय तह संस्थागत क्षमता स्वमूल्याङ्कनमा औसत ८४.२५ प्रतिसत अङ्क ल्याएर शहिद लखन जिल्लामै सर्वोत्कृष्ट बनेको हो । 

शहिद लखनको यो नतिजा अघिल्लो वर्ष भन्दा राम्रो हो । अघिल्लो आर्थिक वर्ष २०७८।०७९मा ८३.७५ प्रतिशत अंक ल्याएर जिल्लामै दोस्रो भएको थियो । यसवर्ष भने सो नतिजामा सुधार गरेर शहिद लखन जिल्लामै सर्वोत्कृष्ट बनेको हो । 

आफ्नो पालिका स्थानीय तह संस्थागत क्षमता स्वमूल्याङ्कनमा जिल्लामै सर्वोत्कृष्ट बनेपछि खुशी लागेको गाउँपालिकाका प्रमुख प्रशासकीय अधिकृत बाबुराम मगरले प्रतिक्रिया दिए । पहिलो बन्ने भन्दा पनि सेवाग्राही, जनप्रतिनिधि, कर्मचारी लगायत सबैको सहयोगले नियम ऐन कानुन र कार्यविधिको परिधि भित्र रहेर काम गर्दै जादा सर्वोत्कृष्ट हुन पुगेको उनले बताए । यस्तै यो नतिजाले खुशी ल्याउनुका साथै आगामी दिनमा समेत थप कमजोरी रहेको सूचकमा सुधार गरी काम गरिने पनि उनले बताए ।

स्वमूल्याङ्कन कार्यविधिमा समावेश गरिएका बिभिन्न १० सूचक र १०० उपसूचकका आधारमा संस्थागत क्षमता स्वमूल्याङ्कन गर्ने गरिन्छ । निर्धारित सूचकहरु मध्ये शहिद लखनले सेवा प्रवाहमा १३ र सबैभन्दा कम सहकायर् र सम्बन्धमा ४.५ अंक प्राप्त गरेको छ ।

यसैबिच उक्त सूचीमा बारपाक सुलिकोट गाउँपालिका ८३.५० अंकका साथ दोस्रो र गण्डकी गाउँपालिका ८१.७५ अंकका साथ तेस्रो स्थानमा रहेको छ ।