तमू प्ये ल्हु संघ चितवनले नारायणी किनारमा बृहत ल्होसार मनाउने,

चर्चित लोक गायक मिलन लामाको प्रस्तुतीको साथमा प्हच्यु, क्ल्हेप्री, बोनलम्को नृत्य पनि देखाइने

इच्छाकामना न्युज

१०, पौष २०८०

तमू प्ये ल्हु संघ चितवनले नारायणी किनारमा बृहत ल्होसार मनाउने,

भरतपुर । तमू प्ये ल्हु संघ चितवनले यसवर्षको तमू ल्होसार पर्वलाई विशेष बनाउन नारायणी नदी किनारमा मनाउने तयारी गरेको छ । गुरूङ समुदायको धार्मिक एवम् सांस्कृतिक संस्थाको रूपमा स्थापित संस्थाले यसपटक खुला स्थानमा ल्होसार मनाउने तयारी गरिएको मङ्गलबार भरतपुर–११, नौरङ्गेस्थित खेमा तमू समाजको क्होइबोमा आयोजित पत्रकार सम्मेलनमार्फत जानकारी गराएको हो । संघका अध्यक्ष बिक्रम च्हम्रु तमूका अनुसार ल्होसार पर्वलाई थप परिचित गराउने उद्देश्यले नदी किनारमा मनाउने तयारी गरिएको हो ।

‘हामीले तयारी करिबकरिब सकाएका छौँ,’ उनले भने, ‘कार्यक्रममा धेरैभन्दा धेरैलाई उपस्थित गराउने प्रयास गरेका छौँ ।’ जिल्लाका सबैलाई पायक पर्ने सार्वजनिक स्थान भएको हुँदा यसवटक नदी किनारमा विशेष कार्यक्रम गर्ने योजना बनाएको उको भनाइ छ । प्ये ल्हु संघले यसपटक पुस १३ गते नै ल्होसार मनाउने तयारी गरेको हो । १५ गते मुख्य दिन भए पनि धेरै टोल तथा इकाइहरूमा मनाउने हुँदा जिल्ला समितिले १३ गते नै मनाउने तयारी गरिएको संघका सचिव चित्र ‘सोल्टी’ तमूले जानकारी दिए ।

‘१५ गते धेरै ठाउँमा ल्होसार मनाउने हुँदा हामीले अगाडि नै मनाउने तयारी गरेका हौँ,’ उनले भने । यसपटकको ल्होसारमा मौलिक लोक संस्कृति संरक्षण गराउन कौडासहित सोरठी, मारूनी, बाह्रमासे घाँटु, स्यार्गालगायत लोप हुने अवस्थामा पुगेका मौलिक लोक संस्कृतिलाई विशेष जोड दिइएको छ । १३ गते बिहान नारायणढस्थित क्याम्पाचौरबाट झाँकीसहितको बृहत् ¥याली आयोजना गरिएको उनले बताए । क्याम्पाचौरबाट सहिदचोक, पुलचोक हुँदै नदी किनार पुग्ने ¥यालीमा घाँटु, सोरठी, स्यार्गाजस्ता मौलिक लोक नृत्य प्रस्तुत गरिने उनको भनाइ छ ।

कार्यक्रममा चर्चित लोक गायक मिलन लामाको प्रस्तुतीको साथमा प्हच्यु, क्ल्हेप्री, बोनलम्को नृत्य पनि प्रस्तुत गरिने आयोजकले जानकारी दिएको छ ।