गैँडाकोटमा सामुदायिक वन सिमसार क्षेत्रको संरक्षणमा जुट्दै

इच्छाकामना न्युज

२०, माघ २०७९

गैँडाकोटमा सामुदायिक वन सिमसार क्षेत्रको संरक्षणमा जुट्दै

मायाँ कँडेल, नवलपरासी । नवलपरासीको गैँडाकोटमा केही सामुदायिक वन सिमसार क्षेत्रको संरक्षणमा जु्टेका छन् । देशभर ७ लाख ५० हजार हेक्टर क्षेत्रफलमा सिमसार फैलिएको छ ।

जनसङ्ख्या बढेसँगै सिमसारमाथिको अतिक्रमण बढिरहेका बेला उनीहरू संरक्षणमा जुटेका हुन् । गैँडाकोट ११ का गोपी नेपालीले भेडावारी वनको तालतलाउ, ओसिलो क्षेत्रको संरक्षण अभियानकै कारण सिँचाइ र पिउनका लागि पानीको समस्या नभएको बताउनुभयो ।

गैँडाकोट नगरपालिकामा पर्ने भेडाबारी सामुदायिक वनले कार्ययोजना बनाएर २ वटा सिमसार क्षेत्र पोखरी र कुवाको संरक्षण गरिरहेको छ । सिमसार क्षेत्रको सुरक्षाका कारण खानेपानीको मुहान बढेको, सिचाँइका लागि पानी सजिलै पाइएको वनका कोषाध्यक्ष भोजबहादुर महतोले बताउनुभयो ।

कृषि, सिँचाइ, वातावरण, ग्रामीण पर्यटन, जैविक विविधता, जनावरको संरक्षणमा सिमसार क्षेत्रको भूमिका छ । गैँडाकोटको ढवाह तालले पानीको मुहान संरक्षण सँगै विभिन्न प्रजातिका जनावरको संरक्षणमा नन्दन सामुदायिक वनको सीमासार क्षेत्र जोगाउने अभियानले काम गरेको वनका अध्यक्ष बालकृष्ण गौडेलले जानकारी दिनुभयो ।

गैँडाकोट नगरपालिका क्षेत्रमा २२ वटा सामुदायिक वन छन् । त्यसमध्ये अहिले ९ वटा सामुदायिक वनमा सिमसार क्षेत्र संरक्षण अभियान चलिरहेको छ ।