सागर खड्का, सिन्धुपाल्चोक । भूकम्पका कारण विस्थापित सिन्धुपाल्चोकको इन्द्रावती गाउँपालिका १ सिम्पाल काभ्रेवासी वर्षौदेखि खानेपानीको अभाव झेल्न बाध्य भएका छन् । पुस्तौँदेखि बसोबास गर्दै आइरहेको सिङगो बस्तीको जमिन नै चिरा परेपछि गाउँ छाड्नु परेका उनीहरूलाई बस्ती स्थानान्तरण भएको वर्षौ बित्दा पनि पिउने पानीको समस्या समाधान भएको छैन । जसका कारण विस्थापितहरूको दैनिकी नै प्रभावित बनेको छ ।

भूकम्पले इन्द्रावती गाउँपालिका १ को तल्लो बसेरी, ढाडेँ लगायतका सिङगो बस्ती र खेतियोग्य जमिन समेत चिरा परेर बस्न नहुने भएपछि ५३ घरधुरी परिवार गाउँपालिकाको वडा नम्बर ४ नवलपुरमा सामूहिक जग्गा खरिद गरेर सरेका थिए । बस्तीको प्रत्येक घरमा धारा बनाइए पनि खानेपानी सङ्कलनको लागि बनाइएको ट्याङकी गुणस्तरीय नहुँदा काम नलाग्ने बनेको हो । बस्तीको लागि स्थायी खानेपानीको मुल समेत नहुँदा एक गाग्री पानी थाप्न दैनिक ३ किलोमिटर टाढा पग्नु पर्ने बाध्यता रहेको स्थानीयवासी हिरामाया तामाङले गुनासो गर्नुभयो ।

भूकम्पछि स्थानान्तरण भएको स्थान भिरालो जमिनमा भएका कारण अहिले निर्माण भएका घरहरू समेत चर्किएका छन् । विस्थापितहरूलाई खानेपानी समस्यासँगै जीविकोपार्जनको समेत चिन्ताले सताएको छ । प्रति घर ६ आना जमिन लिएर बस्ती बसालेका उनीहरूलाई तरकारी खेति, पशुपालनलगायत अन्न उत्पादनको लागि आवश्यक जमिन नहुँदा दैनिक गुजारा चलाउन समस्या भइरहेको अर्का स्थानीयवासी सुकमाया बोम्जनले बताउनुभयो ।

गाउँपालिकाको केन्द्र नजिकैको बस्तीमा पिउने पानीको समस्या अन्त्य गर्न स्थानीय तहले योजना बनाएको बताएपनि कार्यान्वयन कहिले हुने भन्नेमा स्थानीय ढुक्क छैनन् । इन्द्रावती गाउँपालिकाका अध्यक्ष झम्क नेपालले भने अबको दुई महिनाभित्रमा खानेपानीको समस्या समाधान गर्ने बताउनुभयो । नेपालको संविधान २०७२ को धारा ३५ मा स्वास्थ्य सम्बन्धी हक अन्तर्गत प्रत्येक नागरिकलाई स्वच्छ खानेपानी तथा सरसफाइमा पहुँचको हक हुने छ भनि स्पष्ट व्यवस्था गरिएको छ तर पनि यहाँका नागरिक पिउने पानीको अभाव झेलिरहेका छन् ।