धनकुटाका किसानले लगाएको सयपत्री नफुल्दा किसान चिन्तित

इच्छाकामना न्युज

३, कार्तिक २०७९

धनकुटाका किसानले लगाएको सयपत्री नफुल्दा किसान चिन्तित

विदुर खवास, धनकुटा । गतवर्षकोभन्दा यसपाली तिहार केही दिन छिटो छ । तिहार सुरु हुन एक साताभन्दा कम समय बाँकी रहँदा धनकुटामा व्यवसायिक रुपमा लगाईएको तिहार लक्षित सयपत्री फूल फुलेको छैन । सयपत्रीको पकेट क्षेत्र मानिने स्याउले, लाँकुरे र सिप्तेनमा तिहार लक्षित फूल नफूलेपछि किसान चिन्तित बनेका छन् ।

धनकुटा–३, सिप्तेनका रेसबहादुर राईले यस वर्ष पनि १० रोपनी क्षेत्रफलमा सयपत्री फूलको खेति गर्नु भएको छ । फूल बेचेरै वर्षमा एक लाख ५० हजारभन्दा बढि आम्दानी गर्ने राई यो वर्ष भने फूल कम फुलेका कारण चिन्तामा हुनुहुन्छ ।

अर्का किसान सुकमाया राई पनि ५ रोपनी क्षेत्रफलमा लगाएको फूल नफुलेपछि निरास हुनुहुन्छ । तिहार नजिकिँदै गर्दा फूल नफुलेपछि, चाडपर्वको खर्च कसरी जोहो गर्ने भन्ने चिन्ता उहाँलाई छ ।

कृषि ज्ञानकेन्द्र धनकुटाका अनुसार धनकुटामा व्यवसायिक नभएर मौसमी फूल खेति हुने भएकाले मौसम परिवर्तन, कृषिबालीमा अधिक विषादीको प्रयोग र समयमा वर्षा नहुँदा यस्तो समस्या देखिएको हो ।

धनकुटाको स्याउले, लाँकुरे र सिप्तेन क्षेत्रका सयभन्दा बढि किसान समयमा सयपत्री फूल नफुलेका कारण चिन्तित छन् । एक सय ४० रोपनी क्षेत्रफलमा लगाईएको फूल नफुलेपछि ५० लाख बराबरको नोक्सानी हुने किसानहरूरुको भनाइ छ ।