तोलाकान्त बगाले, वालिङ, स्याङ्जा । स्याङ्जा जिल्ला अदालतले लक्ष्यभन्दा धेरै मुद्दा फछ्र्यौट गरेको छ ।

अदालतले गत आर्थिक वर्ष २०७८/०७९ का लागि सात सय ३० वटा मुद्दा फछ्र्यौट गर्ने लक्ष्य राखेकोमा सात सय ४६ मुद्दा फछ्र्यौट गरेको फिराद दर्ता शाखाका शोभाकान्त पौडेलले बताउनुभयो । उहाँका अनुसार अघिल्लो आर्थिक वर्ष २०७७/०७८ बाट जिम्मेवारी सरेर आएका तीन सय ८६ र गत आर्थिक वर्ष २०७८/०७९ मा दर्ता भएका पाँच सय ९६ गरी कूल एक हजार १८२ रहेका थिए ।

अदालतले एक हजार १८२ मुद्दा मध्ये सात सय ४६ मुद्दा फछ्र्याैट गरेको छ भने चार सय ३६ मुद्दा चालु आर्थिक वर्षका लागि जिम्मेवारी सरेर आएका छन् ।  अदालतले गत आर्थिक बर्षमा २०७८/०७९ मा नयाँ छ सय ८७ मुद्दा र अघिल्लो आर्थिक बर्षबाट जिम्मेवारी सरेर आएका तीन सय ८६ मुद्दा सहित एकहजार ७३ मुद्दाको अनुमान गरेको थियो । अदालतले अनुमान गरेको भन्दा विभिन्न प्रकृतिका १०९ वटा मुद्दा बढी परेका उहाँले बताउनुभयो ।  

स्याङ्जा जिल्ला अदालतले गत आर्थिक वर्ष  २०७८/०७९ मा कूल मुद्दा एकहजार १८२ को ६३ दशमलब ११ प्रतिशत मुद्दाहरु फछ्र्यौट गरेको छ ।  अदालतमा सबैभन्दा धेरै मुद्दा सम्बन्ध विच्छेदका रहेका छन् । अघिल्लो आर्थिक वर्षबाट जिम्मेवारी सरेर आएका र नयाँ दर्ता सहित चार सय ६१ वटा रहेका छन् । जसमध्ये तीन सय ७१ वटा फछ्र्यौट भईसकेका छन् भने ९० वटा बाँकी रहेका छन् ।

अघिल्लो आर्थिक वर्ष २०७७/०७८ मा तीन सय ४ वटा मुद्दा दर्ता भएकोमा दुई सय ४० वटा फछ्र्यौट भएको थियो । ६४ वटा मुद्दा गत आ.व. २०७८/०७९ मा जिम्मेवारी सरेर आएको थियो । तुलनात्मकरुपमा पछिल्ला वर्षहरुमा सम्बन्ध विच्छेदका मुद्दाहरु दर्ता हुने क्रम बढ्दै गएको छ । त्यस्तै दोस्रोमा अंशबण्डाका मुद्दा छन् । कूल एकसय ३१ वटा मुद्दामध्ये ६० वटा फछ्र्यौट हुँदा ७१ वटा बाँकी रहेका छन् ।