सप्तकोशीले धार परिवर्तन गरेर विस्थापित भएकाहरू बिरामी पर्न थाले

इच्छाकामना न्युज

२८, श्रावण २०७९

सप्तकोशीले धार परिवर्तन गरेर विस्थापित भएकाहरू बिरामी पर्न थाले

अमर खड्का, सुनसरी । एक साताअघि सप्तकोशी नदीको बाँध फुटेपछि विस्थापित भएकाहरू बिरामी पर्न थालेका छन् । नदीले धार परिवर्तन गर्दा उदयपुरको बेलका नगरपालिकाका पाँच वटा बस्ती विस्थापित भएका थिए ।

अस्थायी रुपमा बसोबास गरिरहेका विस्थापित मध्य अधिकांशलाई ज्वरो, झाडा पखाला लगायतका स्वास्थ्य समस्या देखिन थालेको छ ।सप्तकोशी नदी धार परिवर्तन गरीमानव बस्तीमा पस्दा बेलका नगरपालिका १, २, ३, ८ र ९ का स्थानीयलाई सुरक्षीत स्थानमा सारिएको थियो । जनता क्याम्पस, खसीबाख्रा सङ्कलन केन्द्र कान्तेचौरी र वानडाँडाको रेडक्रस भवन बसिरहेकाहरू अत्यधिक गर्मीका कारण बिरामी पर्न थालेका छन् ।

सप्तकोशी नदीका कारण झण्डै २० हजार मानिसजोखिममा छन् । जसमध्यएक सय ९ परिवारका एक हजार ५१ जनालाई सुरक्षित स्थानमा राखिएको छ । शिविरमा बस्नेहरू मध्य अधिकांश जेष्ठ नागरिक र बालबालिका बिरामी परेको बेलका नगर अस्पतालका मेडिकल सुपरिटेन्डेन्ट विशाल राईले बताउनुभयो ।

नगरपालिकाले बिरामीको उपचारका लागि शिविरमै स्वास्थ्यकर्मी खटाएको छ । कतिपय मानिस उपचार पछि निको पनि भएका छन् । अस्थायी रुपमा शिविरमा बसेकाहरूले स्वच्छ पानी, खानेकुरा पाएका छैनन् । उनिहरू सरकारले तत्कालै स्थायी बसोबासको प्रवन्ध मिलाउन पहल गर्नुपर्ने बताईरहेका छन् ।