आँबुखैरेनी । तनहुँको आँबुखैरेनी गाउँपालिकाले खाना, खाजा र भ्रमणमा मात्रै झण्डै करोड रुपैयाँ खर्च गरेको देखिएको छ। महालेखा परीक्षकको कार्यालयको ५९ औं प्रतिवेदनले आर्थिक वर्ष २०७७।०७८ मा गाउँपालिकाले नियमविपरित खाना, खाजा र भ्रमणमा मात्रै झण्डै करोड रुपैयाँ खर्च गरेको देखाएको हो।

प्रतिवेदन अुनसार गाउँपालिकाले उक्त आर्थिक वर्षमा अनुगमन तथा भ्रमण खर्च भनेर चालू खर्च शिर्षकबाट रु.२२ लाख ३० हजार खर्च गरेको छ तर भ्रमणको उद्देश्य, अनुगमन तथा भ्रमण प्रतिवेदन, भ्रमण अभिलेख, दुरीको विवरण, सवारी साधनको टिकट आदि नराखेको र जसका कारण अनुगमन तथा भ्रमणको सहि सदुपयोग भएको छ भन्ने आधार नरहेको उल्लेख छ।

यस्तै गाउँपालिकाले खाना तथा विविध खर्च शीर्षकबाट उक्त आर्थिक वर्षमा ७६ लाख रुपैयाँ खर्च गरेको देखाएको छ । गाउँपालिकाले खर्च देखाएपनि प्रमाणको रुपमा बिलमा पेश गरेकाले प्रायोजन विना खर्च गरेकोले कार्यलयकै काममा खर्च भएको भनेर भन्न सकिने यथार्थ प्रमाण नभएकोले  यस्तो प्रवृत्तिमा नियन्त्रण गरी खर्चमा मितव्ययिता कायम गर्नुपर्ने देखिएको जनाएको छ। 

कार्यालयले नियमित विपरित करारको कर्मचारी भर्ना गर्नुका साथै अतिरिक्त सुविधा वापत करार सहित हरेक कर्मचारीलाई ३ देखि ५ हजार रुपैयाँका दरले मासिक खाजा खर्च वापत २४ लाख ६० हजार रुपैयाँ एक वर्षमा भुक्तानी गरेको देखिएको छ भने पालिकाका १४ जना पदाधिकारीलाई समेत नियमविपरित ३ देखि ५ हजार रुपैयाँका दरले मासिक खाजा खर्च वापत ८ लाख ४० हजार रुपैयाँ एक वर्षमा भुक्तानी गरेको देखिएको छ। 

यसले गाउँपालिकालाई आर्थिक व्ययभार पर्न गएकोले यस्तो कार्य नगर्न महालेखाले प्रतिवेदनमा जनाएको छ ।