बाजुराको छेडेदहका नागरिकले नियमित बिजुली बाल्न पाएनन्

इच्छाकामना न्युज

१०, श्रावण २०७९

बाजुराको छेडेदहका नागरिकले नियमित बिजुली बाल्न पाएनन्

मीनबहादुर खड्का, बाजुरा । विद्युत जडान गरेको ८ वर्ष बितिसक्दा पनि बाजुराको खप्तड छेडेदहका नागरिकले नियमित बिजुली बाल्न पाएका छैनन् । खप्तड छेडेदह गाउँपालिका वडा नम्बर ३ र ४ का स्थानीयको घरमा बिजुली जोडिए पनि अनियमित हुँदा सेवाग्राहीलाई समस्या भएको हो ।

बिजुली पु¥याउने गरि खप्तड छेडेदह गाउँपालिकामा आठ वर्षअघि बार्जुगाड जलविद्युत आयोजना सञ्चालनमा आएको थियो । सल्लाको झरो र टुक्की बाल्दै आएकाहरूमा पहिलो पटक बिजुली बल्दा खुसीको सीमा थिएन । तर हिजोआज बिजुली नियमित नभएको गुनासो उनीहरूको छ । बार्जुगाड जलविद्युत आयोजना ब्यवस्थापन समितिले अवरुद्ध भएको बिजुली बाल्नका लागि चासो नदिएको स्थानीयवासी राजेश सुनारले बताउनुभयो ।

आयोजनाको नहर भिरालो जमिनमा भएका कारण ठाउँठाउँमा भत्किएको छ । पाइप जोडेर वर्षात बाहेकका महिनामा बिजुली बाल्ने गरिएको छ । तर नहर भत्किएको तीनचार वर्ष बितिसक्दा पनि मर्मत भएको छैन । बन्द भएको जलविद्युत आयोजना सञ्चालनका लागि पहल भइरहेको व्यवस्थापनसमितिका अध्यक्ष जीवन रावतले बताउनुभयो ।

बाजुरालाई केन्द्रीय प्रसारण लाइनले जोडेको भनिए पनि अनियमित हुने समस्या दोहरिँदै आएको छ । अन्धकारमा बस्नुपर्दा सबैभन्दा धेरै विद्यार्थीहरू प्रभावित हुने गरेका छन् ।