बाँकेको खजुरा स्थित क्यान्सर अस्पताल तिन प्रदेशका नागरिकको लागि भरोसाको केन्द्र बन्दै

सिआईएन

२६, चैत्र २०७८

बाँकेको खजुरा स्थित क्यान्सर अस्पताल तिन प्रदेशका नागरिकको लागि भरोसाको केन्द्र बन्दै

राजन रुचाल, काठमाडौं, २६ चैत । प्राय अस्पतालहरू सुविधा सम्पन्न ठाउँमा खुल्छन् । कारण, विकसित ठाउँमा सबै सेवा सुविधा हुन्छ, जहाँबाट अस्पताल चलाउन सजिलो हुन्छ । अस्पताल बिरामीहरू उपचार गर्ने ठाउँ मात्रै होईन, रोग निको पार्दै मानिसहरूको मुहारमा मुस्कान फर्काउने थलो पनि हो ।

बाँकेको एउटा यस्तो अस्पताल जसले लुम्बिनी, कर्णाली र सुदूरपश्चिम प्रदेशका कयौं बिरामीलाई खुशी दिएको छ । भmण्डै डेढ दशक अघिको परिकल्पना भएपनि खजुरामा सुसील कोईराला प्रखर क्यान्सर अस्पताल खुलेको लगभग चार वर्ष भयो । एक सय शय्याको स्वीकृति पाएको अस्पतालले हाल ६० शय्या सञ्चालन गर्दै आएको छ । जहाँ पश्चिम नेपालका क्यान्सर पीडित बिरामी उपचार गराउन आईपुग्छन् ।

खजुरा स्थित यो अस्पताल सरकारी स्तरबाट सञ्चालित राजधानी बाहिरको दोस्रो क्यान्सर अस्पताल हो । लुम्बिनी, कर्णाली र सुदूरपश्चिम प्रदेशका विभिन्न २२ जिल्लाका बिरामीहरू खजुरा आउँछन् । उपचारका लागि काठमाडौं, चितवन र भारत जानु नपर्दा बिरामीलाई निकै सजिलो भएको छ । पश्चिम नेपालका क्यान्सर पीडित विरामीले घर नजिकै उपचार सेवा पाएका छन् ।

बिरामी आउने दर बढ्दै जाँदा, खजुरामा चहल पहल मात्रै बढेको छैन, अस्पतालमा कार्यरत स्वास्थ्यकर्मीको व्यस्तता पनि बढेको छ । खजुरामा धेरैजसो पाठेघर, स्तन, फोक्सो र मुखको क्यान्सरका बिरामी आउने गरेका छन् । आधुनिक सुविधा र थप जनशक्तीको पर्खाइमा भएपनि बाँकेको खजुरामा रहेको क्यान्सर अस्पताल पश्चिम नेपालका विरामीका लागि बाँच्ने आधार बनेको छ ।