राप्ती सोनारीका झग्गुप्रसाद ओली, कागती खेतीबाट राम्रो आम्दानी गर्दै

इच्छाकामना न्युज

२४, फाल्गुण २०७८

राप्ती सोनारीका झग्गुप्रसाद ओली, कागती खेतीबाट राम्रो आम्दानी गर्दै

निशु जोशी, नेपालगञ्ज, २४ फागुन । बाँकेको राप्ती सोनारी गाँउपालिका १ कुसुमस्थित बाघखोर गाँउका झग्गुप्रसाद ओली कागती खेतीबाट राम्रो आम्दानी गर्न सफल हुनु भएको छ । जङ्गली जनावरले बालीनाली खाइदिन थालेपछि उहाँले जमीनमा कागती खेती सुरु गर्नुभएको थियो । राप्तीसोनारी गाँउपालीका कुसुमस्थित बाघखोर गाँउ नेपालगन्जबाट ७५ किलोमीटर पूर्वमा पर्छ ।

दाङको सीमा क्षेत्रसँग जोडिएको यो गाउँमा झग्गु प्रसाद ओलीले डेढ विगाह जमीनमा कागती लगाउनुभएको छ । बाँके राष्ट्रिय निकुन्जबाट आउने जङ्गली जनावरले अन्य स्थानीयवासीको अन्नबाली खाइदिन थालेपनि आफ्नो कागती खेतीमा कुनै नोक्सानी नभएको उहाँको भनाइ छ ।

११ वर्षअघि कागती रोपेर वैदेशिक रोजगारीका लागि जानुभएको थियो । विदेशबाट ३ वर्षपछि फर्केर आउँदा बारीभरि कागती फलीसकेका थिए । उहाँले रोप्नुभएको ‘सुन कागती’ जातको कागती हिजोआज नेपालगन्ज, दांग, पोखरा लगायतका शहरमा पुग्ने गरेको छ । विभिन्न रोगबाट बचाउन सके कागती खेती आम्दानीका लागि उपयुक्त हुने उहाँको भनाइ छ ।

एकपटक रोपेको यो कागतीले २५ वर्षसम्म फल दिन्छ । एकपटक रोपेको कागतीले वर्षौसम्म फल दिने, बजारमा माग उच्च रहेकाले पनि कागती खेतीमा उहाँ धेरै सम्भावना देख्नुहुन्छ । झग्गुप्रसाद मात्रै ननभएर राप्तीसोनारी वडा नं. १ मा अरु १० जनाले पनि कागती खेती गरीरहेका छन् ।