उषा तामाङ, काठमाडौँ, २४ फागुन । विद्युतीय सवारी साधनका लागि चार्जिङ स्टेशन स्थापना गर्ने काम भइरहेको उर्जा मन्त्रालयले जनाएको छ । एसियाली विकास बैँकको सहयोगमा देशका विभिन्न ३३ स्थानमा ५० ओटा चार्जिङ स्टेशन बैशाख महिनाभित्रै सम्पन्न गर्नेगरि काम भइरहेको मन्त्रालयका प्रवक्ता मधुप्रसाद भेटुवालले जानकारी दिनुभयो ।

स्थानीय तह सँग समन्वय गर्दै बसपार्क रहेको क्षेत्र र प्रमुख राजमार्ग रहेको विभिन्न क्षेत्रका प्रमुख स्थानमा चार्जिङ स्टेशन स्थापना हुनेछ । नेपालमा विद्युतीय सवारी साधनको प्रयोग बढाउन सरकारले अन्तःशुल्क तथा भन्सार महशुल घटाएपनि पर्याप्त चार्जिङ स्टेशन नहुँदा विद्युतीय सवारीसाधनको प्रयोग सोचे अनुसार बढ्न सकेको छैन ।

आर्थिक वर्ष २०७६/७७ को बजेटमा विद्युतीय सवारीसाधनको प्रयोगलाई देशव्यापी बनाउने उल्लेख थियो भने अर्को वर्षको बजेटमा विद्युतीय चार्जिङ स्टेशन स्थापना गर्ने भनिएको थियो । २०८८ सालसम्ममा पेट्रोलियम पदार्थबाट चल्ने सवारीसाधनलाई विद्युतीय सवारीले विस्थापित गर्ने योजना सरकारको रहेको भौतिक पूर्वाधार तथा यातयात मन्त्रालयले जनाएको छ ।

मन्त्रालयकोे यातयात व्यवस्था शाखाका वरिष्ठ विभागीय इन्जिनियर शंकरसिंह धामीले इन्धनबाट चल्ने सवारी साधनलाई पनि विद्युतीय बनाउनेगरि व्यवस्था गर्न लागेको बताउनुभयो । सवारीसाधन विक्री गर्नेहरूको संस्था अटोमोबाइल्स एसोसिएसनका अनुसार बितेको साढे ४ वर्षमा नेपालमा १२ हजार विद्युतीय सवारी साधन आयात भएका छन् । ती सवारीसाधन  बिक्री गर्ने कम्पनीले नै चार्जिङ स्टेशन स्थापना गर्दै आएका छन् ।

अटोमोबाइल्स एसोसियसन नाडाका अध्यक्ष धुर्ब बहादुर थापाले विद्युतीय सवारी साधनको प्रयोग बढ्न थालेपनि सरकारले चार्जिङ स्टेशन स्थापनामा जोड नगर्दा सोचेजति बिक्री हुन नसकेको बताउनुभयो । नेपालमा ७५ प्रतिशत चाइना, २० प्रतिशत भारत र ५ प्रतिशत अन्य मुलुकबाट विद्युतीय सवारीसाधन आयात हुने गरेको छ । विद्युतीय सवारी साधन चलाउँदा इन्धन खर्च २५ प्रतिशत घट्ने भए पनि नागरिक यसप्रति उत्साहित छैनन् ।