दिपिन ढुङ्गाना, सिन्धुपाल्चोक, २१ फागुन । गत असार १ गते र त्यसपछि आएका बाढीका कारण घरबारबिहीन भएका सिन्धुपाल्चोकका नागरिकले सरोकार वालाहरुलाई घच्घच्याउन थालेका छन् । बाढीपछि अस्थायी रुपमा बसेका प्रभावितहरुले स्थायी अवासका लागि पर्याप्त रकम उपलब्ध गराउन माग गर्दै आएका छन् ।

मेलम्ची बाढी प्रभावितले सुरक्षित स्थानमा स्थायी बसोबास र आयआर्जन हुने कार्यक्रमको  माग गरेका छन् । सरकारले दिने रकम पाँच लाखमा घर बनाउन नसकिने भन्दै हेलुम्बुका नागरिकले रकम थप्नु पर्ने बताएका छन् । हेलम्बु ६ का दुर्गा प्रसाद गजुरेललाई बाढीले सुकुम्बासी जस्तै बनायो । अहिले उहाँको न बस्ने ठाउँ छ न खेति लगाउने जमिन । बाढीपछि जग्गा अभावकै कारण अस्थायी टहरा समेत बनाउनु नपाएका गजुरेल अहिले पाटिमा बस्नुहुन्छ । प्रदेश र केन्द्र सरकारले चासो कम दिएका कारण स्थायी बसोबासमा बिलम्ब भएको उहाँको बुझाई छ ।

बाढीकै कारण मेलम्ची खानेपानी आयोजना समेत प्रभावित छ । खोला नियन्त्रणका लागि अल्पकालिन रुपमा ३० करोड र सडकको लागि २५ करोड बजेट विनियोजन हुनुका साथै मेलम्ची खानेपानी आयोजनाको मुहानस्थलसम्मको वैकल्पिक बाटोको लागि पनि थप ७५ करोड बजेट प्रस्ताव पेश गरिएको आयोजनाले दाबी गरेको छ । राजधानीलाई खानेपानी उपलब्ध गराउने गाउँपालिका भएर पनि हेलम्बु गाउँपालिकाले सरकारसँग अलि धरै अपेक्षा गरेको छ ।

५ लाखले प्रभावितको घर बनाउन सम्भव नभएको भन्दै राहत रकम थप गर्न हेलम्बु गाउँपालिकाले पनि माग गरेको छ । मेलम्ची बाढीबाट हेलम्बु गाउँपालिकामा मात्रै तीन सय ८ घरधुरी प्रभावित भएका छन् । ति मध्य एक सय २५ घरधुरीको मात्रै हालसम्म अस्थायी आवास निर्माण भएको छ ।