महङ्गी बढ्न थालेपछि दैनिक गुजारा गर्नै समस्या हुन थालेको उपभोक्ताहरूको गुनासो

सिआईएन

१२, फाल्गुण २०७८

महङ्गी बढ्न थालेपछि दैनिक गुजारा गर्नै समस्या हुन थालेको उपभोक्ताहरूको गुनासो

सजना तिमल्सिना, काठमाडौँ, १२ फागुन । आम्दानीभन्दा खर्च बढि हुन थालेपछि दैनिक गुजारा गर्नै समस्या हुन थालेको उपभोक्ताहरूले बताएका छन् । पछिल्लो समय खाद्यान्नदेखि लत्ताकपडासम्म महङ्गो हुँदै गएपछि नियन्त्रणको लागि सरकारले नै सहुलियत दिनुपर्ने लगायतका माग उपभोक्ताहरूको छ ।

ललितपुरका श्रृजना आचार्यले आम्दानीभन्दा खर्च धेरै हुन थालेपछि गरि खाने वर्गलाई घर चलाउनै समस्या हुन थालेको बताउनुभयो । सोलुखुम्बुबाट दुई वर्षअघि काठमाडौँ आउनुभएका सिर्जना तामाङले समयसँगै महङ्गी पनि बढ्दै जाँदा बचत गर्न निकै कठिन भएको बताउनुभयो । केन्द्रीय तथ्याङ्क विभागका अनुसार एक नेपालीको औसत आम्दानी मासिक १७ हजार ८ सय ९ रुपैयाँ मात्र छ । यो आम्दानीको कम्तिमा ८० प्रतिशत खर्च भइरहेको छ ।

अन्तराष्ट्रिय बजारमा नै महङ्गी हुँदा नेपालमा पनि त्यसको प्रभाव परेको यसक्षेत्रका जानकार बताउँछन् । कोरोना महामारीपछि विश्व अर्थतन्त्रमा नै असर गर्दा महङ्गी बढेको विभिन्न अध्ययनले समेत देखाइसकेको छ । यो अवस्थामा महङ्गी नियन्त्रण गर्न सरकारले दीर्घकालिन योजना ल्याउनुपर्ने अर्थशास्त्री डा. दधि अधिकारीले बताउनुभयो । हरेक क्षेत्रमा महङ्गी बढ्दा दैनिक ज्यालादारी गरेर खानेहरू नै पहिला प्रभावित हुने भएपनि राजनीतिक जोडघटाउबाट फुर्सद नपाएको सरकारले जनताको चुल्हो बल्यो कि बलेन चासो दिएको छैन ।