उषा तामाङ, काठमाडौँ, २७ माघ । कमल थापाको बर्हिगमनसँगै राप्रपा फेरि एक पटक विभाजनको सङ्घारमा पुगेको छ । २०४७ सालमा गठन भएको राष्ट्रिय प्रजातन्त्र पार्टी राप्रपा हालसम्म राप्रपामा ६ पटक भन्दा धेरै औपचारिक रुपमै विभाजन भएको छ । 

मंसिरमा सम्पन्न एकतामहाधिवेशनमा पराजित भएपछि पुर्वराजा ज्ञानेन्द्र शाहसँग असन्तुष्ट बन्नुभएका पुर्वअध्यक्ष थापाले मङ्गलवार पार्टी छोड्ने घोषणा गर्दै सक्रिय राजतन्त्रको एजेण्डा समेत छोडेको बताउनुभएको थियो । राप्रपाले थापाको निर्णय दुःखद मान्दै पार्टीमा फर्कन आग्रह गरेको छ । 

पटकपटक फुटेर छिन्न भिन्न भएको कमल थापा नेतृत्वको राप्रपा र पशुपतिशमशेर राणा तथा डा.प्रकाशचन्द्र लोहनीको नेतृत्वमा रहेको राप्रपा संयुक्तबीच २०७६ फागुन २८ मा भएको एकिकरण समाहरोहमा थापाले गीताको पुस्तक छोएर पार्टी नफुटाउने कसम खानुभएको थियो । थापाले पार्टी छोडेपछि कार्यकर्ताले असन्तुष्टि व्यक्त गरेका छन् । सरकारले स्थानीय तहको निर्वाचन घोषणा गरिसकेको अवस्थामा राप्रपा अहिले आन्तरिक उल्झनमा परेको छ ।  

विश्लेषक विश्वकान्त मैनालीले नेपाल जस्तो मुलुकमा पार्टी विभाजन भइरहनु दुःखद भएको बताउनुभयो । पछिल्लो पटक कमल थापाले गर्नुभएको निर्णयले राप्रपा र स्वयम थापालाई नै असर गर्ने उहाँको भनाइ छ ।  

यसैबीच पार्टी भित्र देखिएको समस्या समाधानका लागि आज पदाधिकारी बैठक बस्दैछ । धूम्बाराहीस्थित केन्द्रीय कार्यालयमा आज दिउँसो बस्ने बैठकमा पार्र्टीभित्र विकास हुँदै गएको गुट तथा उपगुटको अन्त्य, पार्टीलाई सम्भावित विभाजनबाट रोकेर आगामी निर्वाचनमा सफलता कायम गर्ने लगायतका विषयमा छलफल हुने जनाएको छ ।