लमजुङमा यसवर्ष ८५ प्रतिशतले अलैंँची उत्पादन घट्यो

सिआईएन

१८, माघ २०७८

लमजुङमा यसवर्ष ८५ प्रतिशतले अलैंँची उत्पादन घट्यो

शान्ता कमली, लमजुङ, १८ माघ । लमजुङमा यसवर्ष ८५ प्रतिशतले अलैंँची उत्पादन घट्दा किसान चिन्तित भएका छन् । जिल्लामा गतवर्ष ४ सय मेट्रिक टन अलैँची उत्पादन भएकोमा यसवर्ष ३५ मेट्रिक टनमा झरेको छ ।

गतवर्ष लमजुङका अलैंची किसानले ४ सय मेट्रीक्टन अलैंची दाना विक्रीबाट १८ करोड २० लाख आम्दानी गरेका थिए । तर यसवर्ष उत्पादन घटेपछि आम्दानी खस्किएर ३ करोड ५० लाखमा सिमित भएको अलैंची व्यवसायी महासंघ गण्डकी प्रदेश अध्यक्ष अजय तामाङले बताउनुभयो । जलवायु परिवर्तन, सिंचाइको कमी र रोग प्रकोपका कारण यसवर्ष अलैची उत्पादनमा भारी गिरावट आएको हो ।

लमजुङमा १ हजार ५ सय हेक्टर क्षेत्रफलमा अलैँची खेती विस्तार गरिए पनि खडेरी र रोग प्रकोपका कारण ६ सय ५० हेक्टर क्षेत्रफलमा मात्र अलैँची उत्पादन भएको छ । दशक अघि प्रतिकिलो २२ सयसम्म पुगेको अलैंचीको मुल्य घटेर हाल १ हजार १ सय ५० मा विक्री भएको छ । जिल्लामा १५ हजार भन्दा बढी किसानले व्यवसायीक अलैंची खेती गर्दै आएका छन् ।

अलैंँचीका लागि उर्वर क्षेत्र मानिएको जिल्लाका उच्च पहाडी क्षेत्रमा उत्पादनमा कमी आएपछि किसान चिन्तित बनेका छन् । जिल्लाको भूलभूले, बाँझाखेत, घनपोखरा, खुदी, गौँडा, इलमपोखरी, दूधपोखरी, बन्सार, ढोडेनी, फलेनी, ताघ्रिङ, कोल्की, पसगाउँ लगायतका क्षेत्रमा व्यावसायिक अलँैचीखेती गरिँदै आएको छ ।

जिल्लाका अलैँची उत्पादन हुने क्षेत्रलाई समेटेर अलैँची जोन कार्यक्षेत्र बनाएर विशेष कार्यक्रम शुरु गरिएको छ । जिल्लामा साउने, डम्बरसाई, जिर्मले, रामशाई, गोलसाई जातका अलैंची खेती हुँदै आएको छ ।