माया कँडेल, नवलपुर, २० पुस । गैँडाकोट आयुर्वेद औषधालयमा तातो बाफबाट उपचार गर्ने अर्थात स्नेहन स्वेदनको सुविधा पाएपछि बिरामीले राहत महशुस गरेका छन् । ४७ प्रकारका आयुर्वेदीक औषधी निःशुल्क साथमा प्रविधिको सहजतासँगै स्वास्थ्यलाभ लिन पाउँदा बिरामी पनि खुसी भएका हुन् । गैँडाकोट ५ की पूर्णकला सापकोटाले आयुर्वेदीक औषधी सँगै स्नेहन स्वेदन गरेपछि भने शरिरमा केहि सहजता महसुस गरेको बताउनुभयो । गोडा र जोर्नी दुख्ने समस्या भएपछि आयुर्वेद औषधालय पुग्नुभएका गैँडाकोट ६ का ७७ बर्षका मानसिंह गुरुङले यसअघि लामो समय उपचार गरे निको नभएपछि बाफ लिन आएको बताउनुभयो । 

आयुर्वेद औषधालयमा जिल्लाका मात्र नभई भरतपुरदेखि पनि बिरामी उपचारका लागि जाने गरेका छन् । आयुर्वेदीक औषधीबाट स्वास्थ्य लाभ हुने र सहज सेवा पाएपछि गैँडाकोट आयुर्वेद औषधालयमा आउनेको संख्या बढ्दै गएको छ । बाफ लिने, स्नेहन स्वेदनसँगै आयुर्वेदीक औषधी प्रयोग गर्न थालेपछि स्वास्थ्यलाई फाइदा पुगेको गैँडाकोट २ की रुक्मणी कुमालले बताउनुभयो । 

गैँडाकोट आयुर्वेद औषधालयमा निशुल्क स्वास्थ्य सेवा पाएपछ सेवाग्राही पनि खुसी भएका छन् । पैसा नभएर रोग पालेर बस्नु नपर्ने उनीहरुको भनाई छ । गैँडाकोट आयुर्वेद औषधालयका बरिष्ठ कविराज निरिक्षक बिष्णुप्रसाद पौडेलले शरीरलाई पञ्चकर्मबाट शुद्द गरि रोगलाई पसिनाको माध्यमबाट निकाल्न बाफ दिएर स्नेहन स्वेदन गराउँदै आएको बताउनुभयो । 

यस उपचार विधिले बिरामीले राहत महशुस गरेपछि चाप वढेको उहाँको भनाई छ । दिन प्रतिदिन आईरहेका प्रविधिले उपचार विधि सहज हुँदै गएको छ । त्यसो त सेवा विस्तार र निःशुल्क स्वास्थ्य सेवा पाउँदा गैँडाकोट आयुर्वेद औषधालयप्रति आर्कषण बढ्दो छ ।