चितवन, २३ मंसिर । प्रत्येक दुई वर्षको अन्तराल पारेर जोर–बिजोर वर्षमा चितवनमा आयोजना हुँदै आएका दुई ठूला महोत्सव यस बर्ष भने एकै समयमा हुने भएको छ । उद्योग वाणिज्य संघ चितवनको आयोजनामा चितवन महोत्सव २०७८ र रत्ननगर उद्योग वाणिज्य संघको आयोजनामा रत्ननगर महोत्सव २०७८ एकै समयमा हुने भएको हो ।

दुबै संघको सरसल्लाह बमोजिम नै दुबै महोत्सव आयोजना गर्न लागिएको बिहीबार उवासंघ चितवनमा आयोजित संयुक्त पत्रकार सम्मेलनमार्फत जानकारी गराईएको छ । चितवन महोत्सव नारायणगढको नारायणी नदी किनारमा पौष २५ गतेदेखि माघ ४ गतेसम्म हुँदैछ । रत्ननगर महोत्सव पौष २७ गतेदेखि माघ ८ गतेसम्म पूर्वी चितवनको टिकौलीमा हुँदैछ ।

उद्योग वाणिज्य सङ्घ चितवनका अध्यक्ष राजु श्रेष्ठले दुई संस्थाबीच छलफल गरेर महोत्सव गर्न लागिएको बताउनुभयो । गत वर्ष कोभिडका कारण चितवन महोत्सव हुन नसकेकामा यस वर्ष गर्नुपरेको जनाउँदै उहाँले सल्लाहमा नै मिति तय भएको जानकारी दिनुभयो । एक अर्को संस्थाले आपसमा आवश्यक सहयोग गर्ने गरी काम अघि बढेको उहाँको भनाइ छ ।

रत्ननगर उद्योग वाणिज्य संघका अध्यक्ष अनिलकृष्ण श्रेष्ठले पनि घनिभुत छलफलपछि दुबै महोत्सव एकैसाथ आयोजना गर्ने निर्णय भएको बताउनुभयो । उहाँले चितवन महोत्सव र रत्ननगर महोत्सव दुबै ब्राण्ड बनिसकेको भन्दै उहाँले एक अर्कालाई सहयोग गरेर अघि बढ्ने बताउनुभयो ।

यस अघि प्रत्येक दुई वषको अन्तरालमा बिजोर वर्षमा चितवन महोत्सव र जोर वर्षमा रत्ननगर महोत्सव आयोजना हुँदै आएको थियो । जस अनुसार चितवन महोत्सव गत वर्षनै आयोजना हुनु पर्ने हो । तर गत वर्ष नै आयोजना गर्ने तय गरिएको १३ औं संस्करणको चितवन महोत्सव कोभिड महामारीका कारण स्थगित भएको थियो ।

रत्ननगर उवासंघले भने पूर्ववत कार्यक्रमलाई नै निरन्तरता दिँदै यस वर्ष रत्ननगर महोत्सव आयोजना गर्न लागेको हो ।

२०५३ सालदेखि आयोजना हुँदै आएको चितवन महोत्सवको यो १३ औं संस्करण हो । उता २०५७ सालदेखि आयोजना हुँदै आएको रत्ननगर महोत्सवको भने यो ११ औं संस्करण हो । विसं २०५९ बाट हरेक विजोर वर्षमा चितवन महोत्सव र जोर वर्षमा रत्ननगर महोत्सव हुँदै आएको छ ।