सरकारको सहयोग नपाएको पुष्प व्यवसायीको गुनासो

सिआईएन

१४, कार्तिक २०७८

सरकारको सहयोग नपाएको पुष्प व्यवसायीको गुनासो

सीता शर्मा, काठमाडौँ, १४ कार्तिक । नेपालमा पुष्प व्यवसाय फस्टाउँदै गए पनि सरकारको तर्फबाट अपेक्षा गरेजति सहयोग नपाएको व्यवसायीको गुनासो छ । फूलको व्यवसाय र बजार प्रवर्धनका लागि सरकारी तवरबाट आर्थिक, भौतिक तथा प्राविधिक सहयोगको माग उनीहरूको छ ।

फूलप्रतिरुचि राख्ने बढेसँगै फूलको व्यापार गर्नेहरू पनि बढेका छन् । पुष्प व्यवसायीहरूको संस्था फल्लोरी कल्चर एसोसियसनका अनुसार नेपालमा अहिले ४ सयभन्दा बढी प्रजातिका फूलउत्पादन हुन्छन् ।

झण्डै ८ सय किसान व्यावसायिक रुपमा फूल खेतीमा लागेका छन् । तर सरकारबाट सहयोग नपाइएको गुनासो पुष्प व्यवसायीहरूको छ । नेपालमा सरकारी तवरबाट फूलको अनुसन्धान र उत्पादनका लागि ललितपुरमा पुष्प विकास केन्द्र सञ्चालनमा छ ।

सातवटै प्रदेशमा पुष्प विकास केन्द्र भएमा व्यवसायीलाई राहत हुने फलोरिकल्चर एशोसिएसनका अध्यक्ष मीनबहादुर तामाङको भनाइ छ । ठूला सहरबाहेक गाउँघरमा पनि हिजोआज पुष्प व्यवसाय गर्ने लहर चलेको छ । सरकार पनि नेपालमा फूलको आयात प्रतिस्थापन गर्नेगरी लागिपरेको बताउनुहुन्छ अर्थमन्त्री जनार्दन शर्मा ।

फ्लोरिकल्चर एसोसिएसनका अनुसार बर्सेनि २० देखि २५ करोडको हाराहारीमा नेपालमा फूलको आयात हुने गरेको थियो । तर गत वर्ष मात्रै ३८ करोडको फूल आयात भएको छ ।