गोरखा, २५ भदौ । आउँदो कात्तिक २७ गतेदेखि ३० गतेसम्म महाधिवेशनको तयारी गरिरहेको राप्रपाले यही भदौको २८ गते गोरखा जिल्ला अधिवेशन गर्ने भएको छ । जिल्ला अधिवेशनअघि प्रतिनिधि सभाको निर्वाचत क्षेत्र स्तरीय समिति, प्रदेशसभाको निर्वाचन क्षेत्रस्तरीय समिति तथा पालिकास्तरका समितिको अधिवेशन धमाधम सम्पन्न गर्दैछ ।

राप्रपाले जिल्लाको क्षेत्र नं. २ को अधिवेशन सम्पन्न गरेको छ । अधिवेशनले उमानिधि पाण्डेको अध्यक्षतामा राप्रपा क्षेत्र नम्बर दुईको कार्यसमिति सर्वसम्मत चयन गरेको पार्टीका केन्द्रीय कार्यसम्पादन समितिका सदस्य मोहन श्रेष्ठले जानकारी दिए ।

त्यस्तै प्रदेसभाको निर्वाचन क्षेत्र क मा सुशील पन्तको अध्यक्षतामा कार्यसमिति चयन गरेको छ । प्रदेशसभा २ को निर्वाचन क्षेत्र ख मा कुलबहादुर बस्नेतको अध्यक्षतामा सर्वसम्मत कार्यसमिति चयन गरेको छ ।

त्यस्तै क्षेत्र नं. २ को पालिकास्तरको अधिवेशन पनि सम्पन्न भएको छ । अधिवेशनले पालुङ्टार नगरपालिकामा राजन देवकोटाको अध्यक्षतामा, सिरानचोक गाउँपालिकामा शेरबहादुर लामाको अध्यक्षतामा, अजीरकोट गाउँपालिकामा फणिन्द्र अधिकारीको अध्यक्षतामा र बारपाक सुलीकोट गाउँपालिकामा ठाकुर ढकालको अध्यक्षतामा सर्वसम्मत कार्यसमिति चयन गरेको नेता श्रेष्ठले जानकारी दिए ।

क्षेत्र नं. १ को प्रदेशसभा निर्वाचन क्षेत्र क स्तरीय समितिको भदौ २५ गते, क्षेत्र नं. १ को र प्रदेशसभा ख स्तरीय समितिको अधिवेशन २६ गते, गोरखा नगरपालिकाको भदौ २७ गते र जिल्ला अधिवेशन भदौ २८ गते गर्न लागिएको नेता श्रेष्ठले जानकारी दिए ।

केन्द्रीय महाधिवेशनका लागि आउँदो असोज ७ गतेभित्र महाधिवेशन प्रतिनिधि चयन गर्ने कार्यतालिका रहेको उनले बताए । जिल्ला अध्यक्ष, प्रतिनिधिसभा निर्वाचन क्षेत्रस्तरीय समितिबाट दुई जना महाधिवेशन प्रतिनिधि स्वत चयन हुनेछन् ।

त्यस्तै प्रदेशसभा निर्वाचन क्षेत्रस्तरीय समितिका अध्यक्षहरु चारजना, ११ वटै स्थानीय तहस्तरीय समितिका अध्यक्षहरु स्वतः महाधिवेशन प्रतिनिधि चयन हुनेछन् ।

त्यस्तै समावेशीताको आधारमा प्रदेशसभा क्षेत्रस्तरबाट नौ जनाका दरले ३६ जना महाधिवेशन प्रतिनिधि निर्वाचित हुनेछन् । असोज २० गतेभित्र महाधिवेशन प्रतिनिधि चयन भइसक्ने निर्वाचन कार्यतालिका रहेको सहप्रवक्ता श्रेष्ठले जानकारी दिए ।