आँबुखैरेनी, १९ भदौ । तनहुँको आँबुखैरेनीमा नेकपा एमालेको अगुवा कार्यकर्ता भेला सम्पन्न भएको छ। नेकपा एमाले पार्टी विभाजन भई नेकपा एकृकित समाजवादी पार्टी गठन भएसँगै आज आँबुखैरेनीमा नेकपा एमालेले अगुवा कार्यकर्ता भेला आयोजना गरि सम्पन्न गरेको हो। 

मनकामना माई पार्टी प्यालेसको सभाहलमा सम्पन्न भेलालाई सम्बोन्धन गर्ने क्रममा एमालेका अधिंकाश स्थानीय कार्यकर्ताहरुले नेकपा एसको प्रभाव आँबुखैरेनीमा शुन्य रहेको दावी गरेका थिए। भेलामा सम्बोन्धनको क्रममा एमालेबाट निर्वाचित वडा नं. ३ का वडाध्यक्ष पूर्ण बहादुर आलेले आँबुखैरेनीमा एमालेबाट निर्वाचित सम्पूर्ण जनप्रतिनिधीहरु नेकपा एमालेमा नै रहेको बताए। ‘हामी एमालेबाट निर्वाचित ११ जना निर्वाचित जनप्रतिनिधीहरु एमालेमै रहन्छौ, कोही पनि दायाँबाया लाग्दैनौ’ –उनले भने। 

यस्तै सम्बोन्धनकै क्रममा नेकपा एमाले आँबुखैरेनीका अध्यक्ष मीना अधिकारीले पनि आँबुखैरेनीका साविक एमाले कार्यकर्ताहरु अधिकांश एमालेमै रहेको दावी गरेकी छिन्। ‘केहि नगन्य समर्थकहरु नेकपा एसमा गए होलान् तर अधिकांश अगुवा कार्यकर्ता कोही पनि गएको छैन, आँबुखैरेनीमा एमाले पार्टी एकढिक्का छ’ –उनले भनिन्। 

यस्तै नेकपा एमालेका केन्द्रीय सदस्य एक बहादुर रानाको प्रमुख आतिथ्य एवं नेकपा एमालेका गण्डकी प्रदेश सदस्य, तनहुँ जिल्ला अध्यक्ष एवं तनहुँ क्षेत्र नं. २ का प्रतिनिधि सभा सदस्य केदार सिग्देल, तनहुँ जिल्ला पार्टी सचिव एवं राष्ट्रिय सभा सदस्य भगवती न्यौपाने र गण्डकी प्रदेश सदस्य कृष्ण देवकोटाको विशेष आतिथ्यतामा सम्पन्न कार्यक्रममा बोल्ने अधिंकाश प्रमुख वक्ताहरुले पार्टी विभाजनको पक्षमा नलाग्न कार्यकर्ताहरुलाई सम्झाएका थिए।

सम्बोन्धनकै क्रममा पार्टी नेतृत्वमा रहदाँ सरकारले गरेका राम्रा कामहरुको जानकारी जनता माझ लगी आगामी स्थानीय, प्रदेश र संघको निर्वाचनमा पार्टीलाई विजयी गराउन लागि पर्न निर्देशन दिएका थिए। कार्यक्रममा अधिकांश साविक एमालेका अगुवा कार्यकर्ताहरुको सहभागिता रहेको थियो भने कार्यक्रमको संचालन सचिव बेल बहादुर गुरुङले गरेका थिए।