चितवन, ५ भदौ । आर्थिक वर्ष २०७६/७७ मा चितवनका सबै स्थानीयतहहरुको बेरुजु रकम करोड भन्दा माथि देखिएको छ। महालेखा परीक्षकको कार्यालयले शुक्रबार सार्वजनिक गरेको ५८ औँ वार्षिक प्रतिवेदनअनुसार जिल्लाका ७ वटा स्थानीय तह मध्य हरेकको बेरुजु रकम करोड भन्दा माथि देखिएको छ। 

प्रतिवेदन अनुसार जिल्लाका स्थानीय तहहरु मध्य प्रतिशतका हिसाबले इच्छाकामना गाउँपालिकामा सबैभन्दा बढि ३.४७ प्रतिशत बेरुजु देखिएको छ। गाउँपालिकामा ९९ करोड ३७ लाख ८५ हजारको लेखापरीक्षण गर्दा ३ करोड ४४ लाख ९८ हजार बेरुजु देखिएको छ। यद्यपी रकमको हिसाबले तुलना गर्दा भरतपुर महानगरपालिकामा सबैभन्दा बढि १० करोड १५ लाख १६ हजार रुपैयाँ बेरुजु देखिएको छ। महानगरमा ४ अर्ब ३ करोड ४२ लाख ४२ हजारको लेखापरीक्षण गर्दा २.०२ प्रतिशत अर्थात सो रकम बराबरको बेरुजु देखिएको हो।

यस्तै जिल्लामा सबैभन्दा कम बेरुजु कालिका नगरपालिकाको देखिएको छ। कालिकामा १ अर्ब ६३ करोड १६ लाख २६ हजारको लेखापरीक्षण गर्दा ०.६५ प्रतिशत अर्थात १ करोड ६ लाख १४ हजार बेरुजु देखिएको प्रतिवेदनमा उल्लेख छ।

यसैगरी जिल्लाका अन्य स्थानीयतहहरु रत्ननगरमा १ अर्ब ६९ करोड ४५ लाख ४१ हजारको लेखापरीक्षण गर्दा २.२८ प्रतिशत अर्थात ३ करोड ८५ लाख ८२ हजार, राप्ती नगरपालिकामा १ अर्ब ५४ करोड ५२ लाख ४० हजार लेखा परीक्षण गर्दा ०.९१ प्रतिशत अर्थात १ करोड ३९ लाख ८५ हजार, खैरहनी नगरपालिकामा १ अर्ब ४४ लाख ८ हजार ८१ हजार रुपैयाँ लेखापरीक्षण गर्दा १.९५ प्रतिशत अर्थात २ करोड ८१ लाख त्रिपन्न हजार रुपैयाँ र माडि नगरपालिकामा १ अर्ब १० करोड ६४ लाख ६३ हजार रुपैयाँ लेखापरीक्षण गर्दा ३ प्रतिशत अर्थात ३ करोड ३२ लाख ४० हजार बेरुजु रहेको महालेखाको प्रतिवदेनले जनाएको छ।