दिपिन ढुंगाना, सिन्धुपाल्चोक, २७ साउन । मेलम्ची र इन्द्रावती नदीमा आएको बाढीेले सिन्धुपाल्चोकमा भौतिक र मानवीय रुपमा ठूलो क्षति गरेको छ । बाढीले हेलम्बु गाउँपालिका, मेलम्ची नगरपालिका र पाँचपोखरी–थाङपाल गाउँपालिका भित्रका नदी तटीय क्षेत्रमा रहेका निजी आवास, विद्यालय, सरकारी भवन र मठमन्दिर भत्किएको छ ।

अहिले नागरिक गास र बासको जोहोमा छन् । डेढ महिना देखि मेलम्ची नदीमा बारम्बार आइरहने बाढीका कारण सिन्धुपाल्चोकका तीनवटा स्थानीय तहले धनजनको क्षति व्यहोरेको छ । जोखिम न्यूनीकरण, क्षतिपूर्ति र उद्धार जस्ता कार्यमा राज्य संयन्त्रले सधै ढिलासुस्ती गरेको भन्दै प्रभावितहरु गास र बासकोे चिन्तामा छन् ।

पर्यटकीय क्षेत्र मेलम्ची बजार र हेलम्बुलाई बाढीले पुर्णरुपमा क्षत विक्षत बनाएको छ । अकल्पनीय मानवीय र भौतिक क्षति व्यहोरेका यस क्षेत्रलाई पुरानै अवस्थामा फर्किन निकै कठिन हुने देखिएको छ । स्थानीय तह तत्कालको लागि गाँस,बाँस र कपासको व्यवस्थापनमा लागेको हेलम्बु गाउँपालिकाका अध्यक्ष निमा ग्याल्जेन शेर्पाले बताउनुभयो ।

मेलम्ची बजार आसपासका खेतका फाँटमा पनि अहिले मेलम्ची र इन्द्रावती नदी बगिरहेको छ । बाढीले हेलम्बु र मेलम्ची क्षेत्रका ६ वटा पक्की पुल र १२ वटा झोलुङ्गे पुल बगाएको छ । बाढीले विकासका पूर्वधारमा क्षति पुगेकाले पर्यटकीय नगरी मेलम्चीका व्यवसायी विस्थापित हुने अवस्थामा छन् । मेलम्चि नगरपालिकाका प्रमुख डम्बर अर्याल सबैभन्दा पहिले बस्ति संरक्षण गर्ने उपाय खोजिरहेको बताउनुहुन्छ ।

असार १ गतेपछि आएको बाढीले हेलम्बु र मेलम्चि क्षेत्रका घरमा क्षति पुगेको छ । मोटरबाटो , विद्युत लगायतको संरचनामा पनि प्रभाव परेको छ ।  हजारौ रोपनी खेती योग्य जमिन ध्वस्त भएको छ भने  दशवटा ट्राउट माछा फार्म पूर्ण रुपमा क्षति भएका छन् ।