मुग्लिन, २५ साउन । चितवनको इच्छाकामना गाउँपालिकाको पशु शाखा मार्फत कामै नगरि ७ लाख ५० हजार रुपैयाँ भुक्तानी भएको देखिएको छ।
शाखाले आव २०७७÷०७८ को संघिय कार्यक्रम अन्तरगत बाख्रा पकेट अनुदान कार्यक्रमका लागि इच्छाकामना मासु उत्पादक समूहलाई कामै नगरी कागजपत्र मिलाएर ७ लाख ५० हजार रुपैयाँ भुक्तानी गरेको हो।

गत आर्थिक बर्षको बाख्रा पकेट एरियाको लागि छुट्टाइएको १५ लाख रुपैया मध्य इच्छाकामनाको सिराइचुली कृषक महिला समूह र इच्छाकामना मासु उत्पादक समूहलाई ७ लाख ५० हजारको दरले छुट्टयाइएकोमा असार मसान्तसम्म काम गर्न नसकिएको कारण पछि काम गर्ने सर्तमा इच्छाकामना मासु उत्पादक समूहलाई रकम भुक्तानी गरेको थियो। यस्तै सिराईचुली कृषक महिला समूहको रकम भने फ्रिज भएको जानकारी दिएको थियो।

कामनै नगरी ७ लाख ५० हजार रकम बुझेको इच्छाकामना  मासु उत्पादक समुहले भने आईतबार स्थानियलाई बितरण योग्य नदेखिने १४ वटा बोयर क्रस बोका  बितरण गरेपछि पहिले भुक्तानी लिएर पछि काम गरेको रहस्य खुलेको हो। समूहले ११ वटा ठूलो र ३ वटा सानू बोयर क्रस बोका प्रती बोका ठुलोलाइ ५ हजार र सानू लाई ३ हजारको दरले कृषक सङ लिएर बितरण गरिएको थियो।

समूहले किनेर वितरण गरेको बोका र मूल्य बिचको अन्तर अस्वभाविक देखिएपछि स्थानीयले बाख्रा पकेट अनुदानको बजेटमा अनियमितता भएको आशंका गरेको छ। स्थानीयले बोकाको तस्विर खिचेर सामाजिक संजालमा राख्दै प्रश्न गरेका छन्। यति बेला यो काण्ड सामाजिक संजालमा भाइरल बन्न पुगेको छ।

यो सम्बन्धमा इच्छाकामना गाउँपालिकाको पशु सेवा शाखा प्रमुख दिपक पुरी सँग कुरा गर्दा कानुनी जटिलता भए पनि कृषकको लागि आएको पैसा फ्रीज नहोस भनेर व्यावहारिकतालाइ ध्यान दिदै शसर्त एउटा समुहलाइ गत ३१ गते रकम भुक्तान गरिएको र उक्त समुहले अहिले काम गरेको स्विकारेका छन्।

उनका अनुसार बाख्रा पकेट अनुदानको रकमले त्यति १४ वटा बाख्रा खरिद मात्र गर्ने नभै त्यही बजेट अन्तरगत खोर सुधार तथा मासु ठेला बितरण लगाएतको काम गर्न बाकि नै रहेको बताए।