चितवन, २४ साउन । चितवनमा नेपाली सेनाका महेन्द्र दल गण राष्ट्रिय निकुञ्ज शिवपुरी टोखामा कार्यरत हुद्दा भरत गुरुङको गत साउन ७ मा भरतपुर महानगरपालिका–१७ स्थित सिमलडाँडामा हत्या भयो ।

खेतको नहरमा मृत फेला परेका उनलाई सैनिक जवान पार्वतीपुरका गंगाधर ढकालले गोली हानेर हत्या गरेको प्रहरीको प्रारम्भिक अनुसन्धानबाट खुलेको थियो । तर, ती ढकाल सैन्य सेवामा प्रवेश गर्नुअघि नै उनको विगत राम्रो थिएन ।

उनी पश्चिम चितवनको विभिन्न ठाउँमा राति राति बाख्रा र खसी चोरी कार्यमा संलग्न रहेको भनेर सेनामा भर्ती हुनु अघि नै प्रहरीमा उजुरी परेको थियो । बाख्रा चोरीमा संलग्न भएको प्रमाणित भएपछि उनका बुबाले जरिवानासमेत तिरेका थिए । उनले बाख्रा चोरेर चितवनका विभिन्न तास घरलाई बेच्ने गर्दथे ।

पार्वतीपुर रंगिलाका एक स्थानीयले नारायणी अनलाइनलाई भने, ‘अपराधिक पृष्ठभूमिको मानिसलाई सैनिक सेवामा भर्ती गर्ने परिपाटी नै गल्ती हो । जिम्मेवार पेसा सेनामा भर्ती गर्नु अघि यस्ता व्यक्तिको पृष्ठभूमि अध्ययन गर्नुपर्दथ्यो ।’ पार्वतीपुर रंगिलाका स्थानीयले ढकालले जिउँदै बाख्रा र खसीको खुट्टा काटेर लैजाने गरी समाजमा अत्याचार र आतंक मच्याउँदै आइरहेको नारायणी अनलाइनलाई बताए ।

चितवन प्रहरीले घटनापछि गरेको पत्रकार सम्मेलन अनुसार हत्यामा नेपाली सेनासँग रहेको स्वचालित सट मेशिन गन (एसएमजी) प्रयोग गरिएको थियो । सैनिक जवान ढकालले सो हतियार दुई वर्षअघि सैनिक ब्यारेकबाट चोरेको अनुसन्धानबाट खुलेको छ ।

हत्या आरोपी सैनिक जवान चितवनको भरतपुर महानगरपालिका–२१ पार्वतीपुर रंगिलाका हुन् । मृतक गुरुङ चाहिँ धादिङको निलकण्ठ नगरपालिकाका स्थानीय हुन् ।

सेनाको आन्तरिक अनुसन्धान र प्रहरीको अनुसन्धानबाट पनि हत्यामा प्रयोग गरिएको एसएमजी चितवनको कालीबहादुर गणबाट चोरिएको हतियार पुष्टि भएको छ । चितवन प्रहरी प्रमुख ओम अधिकारीले सेनाले आफूहरुलाई जानकारी गराएपछि स्पष्ट हुने नारायणी अनलाइनलाई बताए । उनले भने, ‘ हतियार चोरेको भन्ने सुनिएको छ, वृहत जानकारी छिट्टै सार्वजनिक हुनेछ ।’ उनले कर्तव्य ज्यानसम्बन्धी कसुरमा छानबिनको प्रक्रिया अगाडि बढिरहेको बताए ।

सैनिक स्रोतले नारायणी अनलाइनलाई बताए अनुसार कालिबहादुर गणबाट २ वर्षअघि हतियार चोरी भएको थियो । हतियार चोरेको आरोपमा दुईजना सैनिक जेलमा छन् । तर, पछिल्लो अनुसन्धानबाट गंगाधर ढकालले अंकुसेले तानेर हतियार चोरेको पुष्टि भएपछि सैनिक अदालतको आदेशले थुनामा गएका दुईजना सैनिक ‘निर्दोष त हैनन् ?’ भन्ने प्रश्न पनि उठेको छ ।

सबुज गणबाट ढकाल चितवनको कालीबहादुर गणमा सरुवा भएका थिए । त्यहाँ हतियार चोरेर उनले दुई वर्षसम्म लुकाउन सफल भए । कालीबहादुर गणबाट उनी महेन्द्रदल गण राष्ट्रिय निकुञ्ज शिवपुरी टोखामा सरुवा भएका हुन् ।

प्रहरीले पक्राउ गर्दा ढकालको साथमा एसएमजी फेला परेपछि हतियारबारे नेपाली सेनाले पनि आन्तरिक अनुसन्धान गरिरहेको छ । ‘हामी पनि आन्तरिक अनुसन्धान गरिरहेका छौ’ सैनिक प्रवक्ता (सहायकरथी) सन्तोष बल्लभ पौडेलले हतियार कसरी चितवन पुग्यो भनेर जवाफ खोजिरहेको जानकारी दिए ।

नारायणी अनलाईनबाट