तनहुँ, २३ जेठ ।  तनहुँ मिडिया नेटवर्क प्रालिद्धारा सञ्चालित शुक्लागण्डकी एफ.एम. ९७.६ मेगाहर्जका अध्यक्ष पूर्ण कुमार श्रेष्ठको स्मृतिमा अक्षयकोष घोषणा गरिएको छ। रेडियोको स्थापनामा महत्वपूर्ण भूमिका निर्वाह गरेका उनको गएको जेठ १२ गते हृदयघातका कारण ४८ वर्षको उमेरमा निधन भएको थियो।  स्व. श्रेष्ठको स्वर्गारोहण भएको १३ दिनको पुण्यतिथिमा आइतवार ३ लाख रुपैयाको अक्षय कोषको स्थापना गरिएको हो। 

समितिका निवर्तमान अध्यक्ष नारायण श्रेष्ठले कोषको घोषणा गर्दै विभिन्न ३ विधामा क्रियाशिल व्यक्तिहरुलाई वार्षिक रुपमा नगदसहित सम्मान गरिने जानकारी दिए। रेडियोका शेयरधनी सदस्यहरुबाट स्वतस्फूर्त र केहि रकम उहाँको परिवारबाट समेत जम्मा हुने गरि सो बराबरको अक्षयकोष स्थापना गरिएको उनले बताए।  

सो रकमबाट प्राप्त ब्याजले आगामी २०७९ साल असोज ४ गते रेडियो स्थापना भएको दिनको अवसर पारेर नगदसहित सम्मान गरिने छ। यसअघि रेडियोको शुक्रवार बरिष्ठ उपाध्यक्ष ज्योती श्रेष्ठको अध्यक्षतामा बसेको बैठकले कोष स्थापना गर्ने निर्णय गरेको थियो।  पत्रकारिता, साहित्य र समाजसेवाका क्षेत्रमा क्रियाशिल व्यक्तिलाई सम्मान गरिने उनले जानकारी दिए। 

तनहुँ जिल्ला भित्र क्रियाशिल रहेका मध्य एक जना उत्कृष्ट पत्रकारिता क्षेत्रमा लागेका व्यक्ति, तनहुँ जिल्लामा साहित्यिक क्षेत्रमा सक्रिय रहेका व्यक्ति र शुक्लागण्डकी नगर क्षेत्रमा सामाजिक क्षेत्रमा सक्रिय व्यक्ति गरि तीन विधामा सम्मान गरिने छ।  स्व. श्रेष्ठ सञ्चार व्यवसायसँगै, समाजसेवा र साहित्य क्षेत्रमा समेत सक्रिय रहेकाले ३ विधा छनौट गरिएको हो उनले उल्लेख गरे।  

स्व. श्रेष्ठको स्मृतिमा खडा गरिएको अक्ष कोषलाई व्यवस्थित बनाउन आवश्यक विनियम निर्माणका लागि रेडियोका निवर्तमान अध्यक्ष श्री नारायण श्रेष्ठको संयोजकत्वमा आनन्द सुन्दर श्रेष्ठ (सल्लाहकार) र राजन उपाध्याय (स्टेसन मेनेजर) सदस्य रहेको समिति गठन गरिएको रेडियोले जनाएको छ। स्व. श्रेष्ठ रेडियोका संस्थापक उपाध्यक्ष हुन।