काठमाण्डौ, २५ बैशाख । आफू संसदमा अल्पमतमा पर्ने देखिएपछि प्रधानमन्त्री एवम् नेकपा एमाले पार्टी अध्यक्ष केपी शर्मा ओली पार्टी भित्र लचिलो रुपमा प्रस्तुत हुनुभएको छ । २७ गते संसदमा हुने विश्वासको मतदानमा पार्टी भित्रकै माधव नेपाल–झलनाथ खनाल पक्षले भोट नहाल्ने देखिएपछि प्रधानमन्त्री ओलीले सहमतिको लागि पहल सुरु गर्नुभएको हो ।

प्रधानमन्त्री ओलीले सहमति भएको खण्डमा यसअघि गर्नुभएका सम्पूर्ण कारबाही फिर्ता गर्ने गरि तयारी सुरु गर्नुभएको छ । सोही अनुसार बिहीवार र हिजो दुई पक्षका नेताहरुका बीचमा चरण, चरणमा छलफल भएको भएपनि सहमति भने हुन सकेको छैन ।

हिजो सामाजिक सञ्जाल फेसबुकमा स्टाटस लेख्दै नेता नेपालले प्रधानमन्त्री ओलीसँग कुनै पनि किसिमको सहमति नभएको प्रष्ट पार्नुभएको छ । २७ गते बस्ने प्रतिनिधिसभा बैठकमा प्रधानमन्त्री ओलीले विश्वासको मत लिदै हुनुहुन्छ । तर, काँग्रेस, माओवादी केन्द्र र नेपाल पक्षले विश्वासको मत दिन नसकिने प्रष्ट पारिसकेको छ ।

यता जनता समाजवादी पार्टीले भने हालको परिस्थितिमा पक्ष विपक्ष कतै पनि नलाग्ने गरि निर्णय गर्ने अन्तिम तयारीमा पुगेको छ । सीआईएनसँग कुरा गर्दै नेता राजकिशोर यादवले कुनै पनि पक्षमा नलागी तटस्थ भूमिका निर्वाह गरिने बताउनुभयो । सरकारलाई सघाउने विषयलाई लिएर जसपा फुटको संघारमा पुगेपछि मध्यमार्गी धारको खोजी गरिएको नेता यादवको भनाइ छ । तर, नेकपा एमाले ओली पक्षले भने नेपाल पक्षले विश्वासको मत दिने दावी गरेको छ ।

सीआईएनसँग कुरा गर्दै नेकपा एमालेका प्रमुख सचेतक विशाल भट्टराइले नेपाल पक्षसँग सहमति नजिक पुगेको र आफुहरुले विश्वासको मत प्राप्त गर्ने बताउनुभयो ।यसैबीच,प्रधानमन्त्री केपी शर्मा ओलीले संवैधानिक परिषद्को बैठक बोलाउनुभएको छ । भोलि बस्नेगरी बैठक बोलाइएको छ । लामो समयपछि परिषद्को बैठक बस्न थालेको हो । गएको ३० मंसिरयता परिषद्को बैठक बसेको छैन ।