लक्ष्मण विश्वकर्मा, दाङ, २१ बैशाख । दाङका स्थानिय तहहरु अक्सिजन सहितको आईसोलेसन सेन्टर बनाउनमा जुटेका छन् । कोरोनाका बिरामीहरुका लागि आवश्यक पर्ने शय्या र अक्सिजनको अभाव हुन थालेपछि दाङका दश वटै पालिकाले अक्सिजन सहितको आईसोलेसन सेन्टर बनाउन थालेका हुन् ।

यसै क्रममातुलसीपुर उपमहानगरपालिकाले ५० शय्याको अक्सिजन सहितको आईसोलेसन सेन्टर तयार पारेको छ । तर अहिले तत्काल अक्सिजनको व्यवस्था गर्न सकेको छैन । भएजतिको अक्सिजन समेत कोरोना विशेष अस्पताललाई दिईएको नगरप्रमुख घनश्याम पाण्डेले जानकारी दिनुभयो ।

जसले गर्दा अक्सिजन अभावका कारण आईसोलेसन सेन्टर सञ्चालनमा आउन नसकेको उहाँले बताउनुभयो । तुलसीपुर ८ अश्वारामा रहेको मेट्रो अस्पतालमा पनि आईसोलेसन सेन्टर तयार भएको छ । अक्सिजन आपूर्ति हुने वित्तिकै सञ्चालन गर्ने तयारी गरिएको छ । यस्तै घोराही उपमहानगरपालिकाले पनि राप्ती स्वास्थ्य विज्ञान प्रतिष्ठानसँग समन्वय गरी कोरोना बिरामीका लागि आवश्यक पर्ने शय्या तयार गर्न सुरु गरेको नगर प्रमुख नरुलाल चौधरीले बताउनुभयो ।

यस्तै लमही नगरपालिकाले कोरोना सङ्क्रमणको रोकथामका लागि ४० शय्याको आईसोलेसन तयार गरेको छ भने गढवा गाउँपालिकाको २० शय्याको अक्सिजनसहितको आइसोलेसन तयारी अवस्थामा राखेको छ । पश्चिम दाङको बबई गाउँपालिकाले कोरोना सङ्क्रमितको उपचारलाई थप व्यवस्थित बनाउन हापुरेमा अक्सिजनसहितको ३० शय्याको आइसोलेशन सेन्टर सञ्चालनमा ल्याउने तयारी गरेको छ भने दगीशरण गाउँपालिकामा १० शय्याको अक्सिजनसहितको आइसोलेसन सेन्टर तयार पारेको छ ।

यस्तै बंगलाचुली गाउँपालिकाले २० शय्या, राजपुर, राप्ती गाउँपालिकाले आईसोलेसन बनाउने तयारी गरीरहेको छ भने शान्तीनगर गाउँपालिकाले हाल सात शय्याको आईसोलेसन बनाएको र थप २० शय्यासम्म बनाउने योजना रहेको गाउँपालिकाका स्वास्थ्य संयोजक हरि पुनले जानकारी दिनुभयो ।