सर्लाही, १६ चैत जिल्ला ट्राफिक प्रहरी कार्यालय सर्लाहीका असइ ठाकुर भट्टराई कमिसनको खेलमा लागेका छन् । जिल्ला ट्राफिक प्रहरी कार्यालय सर्लाहीमा हालीमुहाली गरि रहेका असई भट्टराईले गजुरमुखी निर्माण सेवा प्रालीबाट मासिक रु ५ हजार असुल्नेगरेका छन् । उनले गजुरमुखी निर्माण सेवा प्रालीका कर्मचारी सुमन पौडेल मार्फत मासिक ५ हजार बुझ्ने गरेको पौडेलले नै बताए ।

जिल्लाका यातायात व्यावसायीहरु लगायतसंग महीनावारी असुल्ने गरेको पाइएको छ । उनले जिल्लाका अटो व्यावसायीहरुबाट मासिक ४ हजार, मयुरी व्यावसायीहरुबाट मासिक ३ हजार ५ सय र म्याजिक तथा माइक्रोहरुबाट मासिक  १० हजार असुल्ने गरेका एक यातायात व्यावसायी अविनाश खड्काले बताए ।

सर्लाही नै घर भइ विगत करिब ६ वर्षदेखि जिल्लामै रहँदै आएका असइ भट्टराइले टयाक्टर लगायत मालवाहक सवारी साधनहरुबाट समेत महिनाबारी असुल्ने गरेका यातायात व्यावसायीहरुले नै बताएका छन् । असई भट्टराईले दुर्घटना भएका सवारी साधनहरुलाई मिलाइ दिने बाहनामा, मालबाहक सवारी साधनहरुलाई लाईन मिलाइ दिने बाहनामा, बिल बुक हराएका सवारी साधनहरुको सिफारिस दिने बहनामा माहिनावारी असुल्ने गरेका एक प्रहरी अधिकारीले बताए ।

यस अघिका प्रहरी निरिक्षक सुर्यनारायण यादवका विश्वास पात्रको रुपमा रहेका असई भट्टराई अहिले पनि प्रहरी निरिक्षक केदारमान दोङ्गको विश्वास पात्रको रुपमा रहेर बसेका छन् । तर उनले असुल्ने कमिसनका बारेमा आफुलाई कुनै जानकारी नै नभएको र त्यस्तो भेटिएमा आवश्यक कार्बाही गर्ने प्रहरी निरिक्षक दोङ्गले बताए । 

जताततैबाट महिनावारी असुल्न पल्केका असइ भट्टराइ जहिले पनि जिल्ला ट्राफिक प्रहरी कार्यालय सर्लाहीका कार्यलय प्रमुखको विश्वास पात्रको रुपमा रहेर जिल्लामा आफुलाई कमिसन बढी हुने स्थानमा पठाउने र कमिसन कम दिनेलाई कम कमाइ हुने स्थानमा पठाउने काममा सकेत अब्बल देखिएका एक प्रहरी अधिकारीले बताए । 

असई भट्टराईले आफु जिल्ला ट्राफिक प्रहरी कार्यालय सर्लाहीको प्रमुख भएझैँ गरि जिल्ला भित्रका सबै युनिटहरुको सरुवा गर्ने काम देखि कमिसन असुल्ने सम्मको काम गरेको प्रहरी अधिकारीले नै बताएका छन् । सो विषयमा प्रदेश नं. २ प्रदेश ट्राफिक प्रहरी कार्यालय पथलैयालाइ जानकारी  नभएको पनि होइन तर उनलाइ अन्यन्त्र पठाउने विषयमा प्रदेश नं २ प्रदेश ट्राफिक प्रहरी कार्यालय पथलैया मौन देखिएको छ ।