प्रचण्ड–माधवसँग सहमति,विश्वासको मत दिन हेटौंडा फर्किँदै नेकपाको असन्तुष्ट समूह

रासस

९, भाद्र २०८३

प्रचण्ड–माधवसँग सहमति,विश्वासको मत दिन हेटौंडा फर्किँदै नेकपाको असन्तुष्ट समूह

हेटौंडा । नेकपाका प्रदेशसभा सदस्य कृष्ण शर्मा खनाल नेतृत्वको टोलीले बागमती प्रदेशका मुख्यन्त्री किरण थापालाई विश्वासको मत दिन तयार भएका छन् ।मंगलवार नेकपाका संम्योजक पुष्पकमल दाहाल ‘प्रचण्ड’ र सह संम्योजक माधवकुमार नेपालसँग भेटवार्ता गरी सहमति जुटेपछि खनाल नेतृत्वको टोली थापालाई विश्वासको मत दिन तयार भएका हुन् ।

छलफल सकारात्मक बनेपछि खनाल नेतृत्वको टोली विश्वासको मतको पक्षमा मतदान गर्न हेटौंडा फर्किँदै गरेको नेकपाका एक सांसदले जनाए । नेकपाका सांसद गंगानारायण श्रेष्ठका अनुसार प्रचण्डसँग ३ वटा विषयमा सहमति जुटेको छ । बागमतीका दलका नेता–उपनेतासमेतलाई आमन्त्रण गरी केन्द्रीय कार्य संयोजन समिति बैठकले नीतीगत निर्णय लिनुपर्छ’, श्रेष्ठले भने । अहिले रहेको ८ वटा मन्त्रालयबाट थप्न नपाउने सर्त पनि आफूहरूले अघि सारेको उनको भनाइ छ । गठबन्धनको ठूलो दलको हैसियतमा एक वटा सभामुख र बाँकी ३ मन्त्री नेकपाले लिने र सोही अनुसार वातावरण बनाउने सहमतिसहित आफूहरू निस्किएको सांसद श्रेष्ठले बताए ।

नेकपाका असन्तुष्ट सांसदहरू गंगानारायण श्रेष्ठ, कृष्ण खनाल, राजेन्द्रमान श्रेष्ठ, युवराज चौलागाईं, रुकु चौलागाईं, लक्ष्मण लम्साल, उर्मिला लामा र ओमकुमारी श्रेष्ठ सोमवार मुख्यन्त्री थापालाई विश्वासको मत दिन अनुपस्थित भएपछि बैठक आज अपरान्ह ४ बजेका लागि बोलाइएको छ । सत्ता गठबन्धनभित्र आवश्यक सहमति जुटिसकेकाले मुख्यमन्त्री थापाले विश्वासको मत प्राप्त गर्नेमा नेताहरू विश्वस्त रहेको बताइएको छ।