प्रदर्शनकारीले जिल्ला प्रशासन कार्यालय मकवानपुरसँगै रहेको उक्त कार्यालयमा क्षति पुर्‍याएका छैनन् । प्रशासन कार्यालयको सुरक्षाका लागि बाक्लो मात्रामा खटिएका प्रहरी र सेनाको टोलीले भवनलाई सुरक्षा प्रदान गरेका थिए । पटक–पटक प्रशासन कार्यालय र मुख्यमन्त्री कार्यालय तोडफोडका लागि आक्रामक रूपमा अघि बढेका प्रदर्शनकारीलाई रोक्न सुरक्षाकर्मी सफल भएका थिए । सोही कारण मुख्यमन्त्री कार्यालयको कम्पाउन्डभित्रै रहेको उद्योग, वाणिज्य, भूमि तथा प्रशासन मन्त्रालयमा पनि क्षति पुगेको छैन ।

प्रशासन कार्यालयसँगै रहेको मकवानपुर जिल्ला अदालत र सहरी विकास तथा भवन कार्यालय मकवानपुरमा भने प्रदर्शनकारीले तोडफोडसहित आगजनीसमेत गरेका थिए ।

प्रदर्शनकारीले सुरुवातदेखि नै हेटौंडा उपमहानगरपालिकाको भवनलाई लक्षित गरी ढुंगामुढा प्रहार गरेका थिए । ढुंगामुढाबाट कार्यालयको अगाडिको गेट, पर्खाल र भवनका सिसाहरूमा क्षति पुगेको छ । प्रदर्शनको क्रममा आन्दोलनकारीहरूले पूर्व–पश्चिम राजमार्ग अवरुद्ध पार्नुका साथै मकवानपुरका केही नेताहरूको निजी निवासमा समेत आगजनी गरेका थिए ।

प्रदर्शनकारीको आक्रमणबाट हेटौंडाका अधिकांश सरकारी संरचना ध्वस्त पारेका छन् ।

कुन–कुन कार्यालय ध्वस्त भए ?

आन्दोलनका क्रममा मकवानपुरमा रहेका प्रदेश र जिल्लाका विभिन्न सरकारी, सार्वजनिक तथा निजी संरचना खण्डहरमा परिणत भएका छन् । आन्दोलनका क्रममा हेटौंडा–१० मा रहेको प्रदेश सभा सचिवालय, बागमती प्रदेशको भवन, आन्तरिक राजस्व कार्यालय मकवानपुर, मदन भण्डारी स्वास्थ्य विज्ञान प्रतिष्ठान, सामाजिक विकास मन्त्रालय, स्वास्थ्य मन्त्रालय, हेटौंडा उपमहानगपालिका १० नम्बर वडा कार्यालय जलेका छन् ।

हेटौंडा–१ स्थित ४ वटा मन्त्रालय रहेको भवन ध्वस्त भएको छ, जसमा कृषि तथा पशुपन्छी विकास मन्त्रालय, श्रम रोजगार तथा यातायात मन्त्रालय, खानेपानी तथा ऊर्जा सिंचाइ मन्त्रालय, र भौतिक पूर्वाधार विकास मन्त्रालय थियो ।

हेटौंडा–२ मा रहेका आर्थिक मामिला तथा योजना मन्त्रालय, लोक सेवा आयोग हेटौंडा कार्यालय, उच्च अदालत पाटनको हेटौंडा इजलास, जिल्ला अदालत मकवानपुर, सरकारी वकिल कार्यालय, मुख्यमन्त्रीको सरकारी निवास, बागमती प्रदेश प्रमुख सचिवको निवास, मालपोत कार्यालय, नापी कार्यालय, आन्तरिक मामिला तथा कानुन मन्त्रालय, हेटौंडा उपमहानगरपालिकाको कार्यालय, सहरी विकास तथा भवन कार्यालय, कोष तथा लेखा नियन्त्रण कार्यालय हेटौंडा, कर्मचारी सञ्चय कोष हेटौंडा, नापी कार्यालय मकवानपुर, सरकारी वकिल कार्यालय जलेका छन् । भाटभटेनी सुपरमार्केट समेत आन्दोलनको क्रममा जलाइएको छ ।

हेटौंडा–११ मा रहेका सहकारी तथा गरिबी निवारण मन्त्रालय, यातायात सेवा कार्यालय, प्रदेश आपतकालीन आपूर्ति केन्द्र र ट्राफिक प्रहरी कार्यालयमा पनि तोडफोड र आगजनी गरिएको छ ।

बकैया गाउँपालिका कार्यालय, मनहरी गाउँपालिका कार्यालय, हटौंडा उपमहानगपालिका वडा नम्बर ३ को कार्यालय भवन, वडा नम्बर ४ को कार्यालय, प्रदेश लोकसेवा आयोग हेटौंडा, सञ्चार रजिष्टारको कार्यालय हेटौंडामा क्षति पुगेको छ ।

राजनीतिक दलका कार्यालय तथा व्यक्तिगत सम्पत्तिहरूमा पनि आन्दोलनकारीले क्षति पुर्‍याएका छन् । प्रदर्शनकारीले कांग्रेसको जिल्ला पार्टी कार्यालय, एमालेको जिल्ला पार्टी कार्यालय, पूर्वमुख्यमन्त्री डोरमणि पौडेलको घर, मुख्यमन्त्री इन्द्रबहादुर बानियाँको निजी २ वटा घर, भीमफेदी गाउँपालिकाका अध्यक्ष हिदम लामाको घर, संघीय सांसद महेश कुमार बर्तौलाको घर र बागमती प्रदेश सभा सदस्य एकालाल श्रेष्ठको घर तथा हेटौंडा–४ स्थित ग्रीन हाउसमा समेत तोडफोड र आगजनी गरेका छन् ।