चितवनमा गुरुङ समुदायको क्होइबो धीँ निर्माणको लागि भारतीय नागरिक सैनिद्वारा १ लाख १२ हजार सहयोग

इच्छाकामना न्युज

१२, फाल्गुण २०८१

चितवनमा गुरुङ समुदायको क्होइबो धीँ निर्माणको लागि भारतीय नागरिक सैनिद्वारा १ लाख १२ हजार सहयोग

चितवन। तमूहरुको मौलिक धर्म, भाषा, संस्कार र संस्कृतिको संरक्षण, प्रबर्द्धन र सम्बर्द्धनको लागि खोलिएको संस्था तमु प्ये ल्हु संघ चितवनले तमूहरूको आस्था र विश्वासको धरोहर क्होइबो धीँ निर्माणार्थ जमिन खरिदको लागि आर्थिक संकलन अभियानमा तमु प्ये ल्हु संघ चितवन अगाडि बढिरहेको छ । सोही अभियानकै क्रममा तमु प्ये ल्हु संघ चितवनलाई हाल दुवईमा कार्यरत भारतीय नागरिक अरूण सैनिले क्होइबो धीँ निर्माणाको लागि १ लाख १२ हजार १ सय १५ रूपैयाँ रकम सहयोग गर्नुभएको छ ।

अभियानलाई स–गौरव सफल पार्नको लागि संस्थाका जिन्सी संयोजक दान बहादुर तेल्मे गुरुङको छोरा पुरन तेल्मे गुरुङले आफ्नो भारतीय साथीलाई आग्रह गरि सो रकम संकलन गरिएको तमू प्ये ल्हु संघ चितवनका अध्यक्ष बिक्रम च्हम्रु तमूले बताउनुभयो । सो रकम सोमबार भरतपुर स्थित पाते ढिंडो एण्ड रिसोर्टमा एक कार्यक्रमको आयोजना गरि संस्थाका अध्यक्ष बिक्रम च्हम्रु तमूलाई हस्तान्तरण गरिएको हो ।

तमू प्ये ल्हु संघ चितवन विगत ३–४ महिना देखि यस अभियानमा अगाडि बढिरहेको छ र २ करोड लागत परियोजनाको अभियानमा अगाडि बढ्दै गर्दा हाल सम्ममा संघले ३५ लाख भन्दा बढी रकम संकलन गरिसकेको अध्यक्ष तमूले जानकारी दिनुभयो ।

सो कार्यक्रममा तमू प्ये ल्हु संघ केन्द्रीय समितिका उपाध्यक्ष तथा बागमती प्रदेश प्रमुख तुलाराम टु क्ल्हेप्री तमू, केन्द्रीय सल्लाहकार जगत बहादुर टु क्ल्हेप्री तमू र कार्यसमितिका पदाधिकारीहरूको सहभागीता रहेको थियो । उक्त कार्यक्रम संस्थाका अध्यक्ष अध्यक्ष बिक्रम च्हम्रु तमूको अध्यक्षतामा सम्पन्न भएको थियो ।