कुलप्रसाद काफ्ले, भरतपुर । चितवनमा जग्गाको कित्ताकाट रोकिएको छ । भदौ २ गतेदेखि कित्ताकाट रोकिएको हो । भू–उपयोग (पहिलो संशोधन) नियमावली, २०८० जारी भएको एक वर्षभित्र जग्गाको वर्गीकरण गर्नुपर्ने बाध्यकारी व्यवस्थाका कारण जिल्लामा जग्गाको कित्ताकाट रोकिन पुगेको हो । जिल्लाका कुनै पनि स्थानीय तहले जग्गाको वर्गीकरण गर्न नसक्दा यस्तो समस्या आएको मालपोत कार्यालहरुले बताएका छन् ।

यो नियमावली २०८० साउन ३२ गते राजपत्रमा प्रकाशित भएको थियो । नियमावलीअनुसार २०८१ साउन ३२ गतेभित्र जग्गाको वर्गीकरण गरिसक्नुपर्ने थियो । नियमावलीमा भएको व्यवस्थाअनुसार जग्गाको वर्गीकरण नभएपछि कित्ताकाट हाललाई रोकिएको मालपोत कार्यालय भरतपुरका मालपोत अधिकृत टीकाराम अधिकारीले बताए । ‘नियमावली जारी भएको एक वर्षमा स्थानीय तहले कित्ताअनुसार समग्र जग्गाको वर्गीकरण गर्नुपर्ने भनेको छ’, उनले भने ।

जग्गाको वर्गीकरण भइनसकेकाले सरकारले म्याद थपेको अवस्थामा मात्रै अब कित्ताकाट खुल्ने छ, वा स्थानीय तहले जग्गाको वर्गीकरण गर्नुपर्छ । कुन कित्ताको जग्गा कुन क्षेत्रमा पर्छ भनी वर्गीकरण गर्नुपर्ने व्यवस्था छ । यसअघि वडाको सिफारिसका आधारमा जग्गाको कित्ताकाट हुने गरेको थियो । अब स्थानीय तहले आफ्नो जग्गाको वर्गीकरण गरी त्यसको विवरण मालपोत र नापी कार्यालयमा पठाउनुपर्ने छ ।

जग्गाको कित्ताकाट रोकिएको भनी आफूले पनि जानकारी पाएको जग्गा व्यवसायी दिनेशकुमार चुकेले बताए । अर्थतन्त्रलाई चलायमान बनाउनका लागि कित्ताकाट खुलाउन मालपोत कार्यालय र स्थानीय तहले सहजीकरण गर्नुपर्ने उनी बताउँछन् । अनाहकमा जनतालाई सास्ती नदिन उनले सम्बन्धित निकायलाई आग्रह गरे । चितवनपोष्टबाट