१८ वर्षीया युवतीलाई यौन दुर्व्यवहारपछि फरार रहेका युवक चार वर्षपछि पक्राउ

इच्छाकामना न्युज

२५, जेठ २०८१

१८ वर्षीया युवतीलाई यौन दुर्व्यवहारपछि फरार रहेका युवक चार वर्षपछि पक्राउ

म्याग्दी । १८ वर्षीया युवतीलाई यौन दुर्व्यवहारपछि फरार रहेका एक युवकलाई म्याग्दी प्रहरीले पक्राउ गरेको छ।

जिल्ला अदालतबाट पाँच वर्ष कैद सजाय तोकिएका मालिका गाउँपालिका–४, महभिरका ३१ वर्षीय रविन श्रीपालीलाई जिल्ला प्रहरी कार्यालय म्याग्दीले पक्राउ गरेको हो।

श्रीपालीले २०७७ साल जेठ १३ गते राति गाउँकी १८ वर्षीय युवतीलाई जबर्जस्ती करणी गर्ने प्रयास गरेको ठहर गर्दै अदालतले उनलाई पाँच वर्ष कैद र २५ हजार रुपैयाँ जरिवाना हुने फैसला सुनाएको थियो।

पीडित युवतीले त्यतिबेलै गरेको उजुरीको आधारमा सिर्पालीलाई सोही राति गिरफ्तार गरी प्रहरीले अनुसन्धान अगाडि बढाएको थियो।

तर, श्रीपालीलाई २०७७ साल असार ५ गते जिल्ला अदालत म्याग्दीले दुई लाख धरौटीमा रिहा गर्ने आदेश दिएको थियो ।

२०७८ साल मङ्सिर ८ गते जिल्ला अदालत म्याग्दीले जबरजस्ती करणी उद्योगमा दोषी ठहर गर्दै श्रीपालीलाई पाँच वर्ष कैद, २५ हजार जरिबाना र एक हजार रुपियाँ पीडित राहत कोषमा दाखिला गर्नुपर्ने फैसला गरेको थियो।

अदालतको फैसलापछि फरार रहेका श्रीपालीलाई यही जेठ २२ गते पोखरा महानगरपालिका–९, पृथ्वीचोक, कास्कीबाट पक्राउ गरिएको जिल्ला प्रहरी कार्यालय म्याग्दीका प्रहरी निरीक्षक राजन रायमाझीले जानकारी दिए।

अदालतको आदेशअनुसार सिर्पालीले चार वर्ष ११ महिना २२ दिन कैद भुक्तान गर्न बाँकी छ।