चितवन । मुग्लिन–नारायणगढ सडकखण्ड अन्तर्गत चितवनको भरतपुर महानगरपालिका २९ स्थित सत्र किलोमा मध्यरातमा ५ वटा गाडी एकापसमा ठोक्किएर दुर्घटना भएको छ । गएराति करिब १२ः३० बजेतिर उक्त दुर्घटना भएको हो । दुर्घटनामा परि एक जनाको मृत्यु भएको छ भने २३ जना घाइते भएका छन्।

जिल्ला प्रहरी कार्यालय चितवनका प्रवक्ता डिएसपी भेषराज रिजालका अनुसार मृतक अन्दाजी १६–१७ वर्षको किशोरको परिचय खुलेको छैन। घाइते २३ जनामध्ये ५ जनाको अवस्था गम्भीर छ भने १३ जना मध्यम र तीन जना सामान्य घाइते छन्। सामान्य घाइते भएका ट्रक चालक सिन्धुपाल्चोक भोटेकोसी गाउँपालिका ५ का २६ वर्षीय सुवास कार्की डिस्चार्ज भइसकेका छन्। उनी जिप्रका चितवनको नियन्त्रणमा छन्।

घाइतेमध्ये १८ जनाको इच्छाकामना आधारभुत अस्पताल कुरिनटार र ४ जनाको नयाँ मेडिकल कलेज भरतपुरमा उपचार भइरहेको छ।

घाइते हुने हरूमा प्यूठानको नौबहिनी गाउँपालिका ७ का २८ वर्षीय सुधन केसी, प्यूठानको प्यूठान नगरपालिका १० का ३६ वर्षीय निरज केसी, मालारानी गाउँपालिका २ कि ३६ वर्षीया निर्मला भूसाल, गौमुखी गाउँपालिका ७ का २५ वर्षीय सुरज सुनार छन्। सुरज जिल्ला प्रहरी परिसर ललितपुरमा कार्यरत प्रहरी जवान रहेको डिएसपी रिजालले जानकारी दिए।

त्यस्तै अर्घखाँचीको सितगंगा नगरपालिका ८ कि २९ वर्षीया पवित्रा दर्लामी, प्यूठानको झिमरूक नगरपालिका ७ का २८ वर्षीय पुरन गिरी, प्यूठानको प्यूठान नगरपालिका ८ का २० वर्षीय समिर केएम, सारुमहारानी गाउँपालिका ४ का ३६ वर्षीय तारापति बुढाथोकी, ३५ वर्षीया मुनादेवी बुढाथोकी,  ऐरावती गाउँपालिका ६ कि ५६ वर्षीय मनदेवी थापा, गाउँपालिका नखुलेको प्यूठानकै ६० वर्षीय पदम थापा घाइते छन्।

प्यूठानकै प्यूठान नगरपालिका १० का २१ वर्षीय सुशील केसी, प्यूठान नगरपालिका ४ कि १७ वर्षीय प्रतिभा भण्डारी, प्यूठान नगरपालिका ८ कि १८ वर्षीया सलिसा थापा, प्यूठान नगरपालिका १ का ३८ वर्षीय प्रकाश केसी, प्यूठान नगरपालिका ८ का ५३ वर्षीया पार्वता केसी, नौबहिनी गाउँपालिका ३ का ३२ वर्षीय गौरव झाँक्री, गौमुखी गाउँपालिका ३ का २९ वर्षीय दीपक सुनार, प्यूठान नगरपालिका ८ का २५ वर्षीय सन्तोष केसी र अर्घखाँचीको सितगंगा नगरपालिका ८ का ४९ वर्षीय रामबहादुर दर्लामी घाइते छन्।

गएराति साढे १२ बजे चितवनको भरतपुर महानगरपालिका २९ स्थित नारायणगढ–मुग्लिन सडकको सत्र किलो भन्ने ठाउँमा काठमाडौंबाट प्यूठान जाँदै गरेको बा ४ ख ९०८६ नम्बरको बस, नारायगढबाट मुग्लिन जाँदै गरेको ना ३ ख ७९१५ नम्बरको डिब्बा ट्रक, काठमाडौंबाट महोत्तरीको बर्दिबास जाँदै गरेको ना ७ ख ३२४८ नम्बरको बस, मालबाहक ट्रक ना ३ ख ५९३६ र वीरगन्जबाट काठमाडौं आउँदै गरेको ना ६ ख ८९६८ नम्बरको बस आपसमा ठोक्किएको थियो।

डिएसपी रिजालका अनुसार ओभरटेक गर्ने क्रममा सो दुर्घटना भएको हो। यसबारेमा थप अनुसन्धान भइरहेको पनि उनले बताए।

५ वटा गाडी ठोक्किँदा नारायणगढ–मुग्लिन सडक राति साढे २ बजेसम्म अवरूद्ध भएको थियो। त्यसपछि एकतर्फी सञ्चालनमा आएको उक्त सडकखण्ड बिहानसम्म दुवैतर्फ सञ्चालनमा रहेको डिएसपी रिजालले जानकारी दिए।