सरकारको विरोध होइन,देश सुधारको सुझाव दिएको हुँ : गायक शङ्कर क्षेत्री

इच्छाकामना न्युज

२४, कार्तिक २०८३

सरकारको विरोध होइन,देश सुधारको सुझाव दिएको हुँ : गायक शङ्कर क्षेत्री

काठमाडौँ । लोक तथा दोहोरी गायक शङ्कर क्षेत्रीले आफ्नो नयाँ ‘देउसी–भैलो’ गीत मार्फत आफूले सरकारको विरोध नगरेको बताएका छन् । आफ्नो गीतमा सरकारको विरोध गरेको भन्दै आलोचना हुन थालेपछि उनले सामाजिक सञ्जालमार्फत आफ्नो स्पष्टीकरण दिएका हुन् ।उनले लेखेका छन्– ‘मैले सरकारको विरोध गरेको होइन ।

देशमा रहेका समस्याहरूलाई उजागर गर्दै ती समस्या कसरी सुल्झाउने भनेर देउसी–भैलोमार्फत सुझाव मात्र दिएको हुँ । उनले दर्शकलाई आफ्नो गीतलाई विरोधका रूपमा नभई देश सुधारको एउटा सुझावका रूपमा बुझिदिन आग्रह गरेका छन् ।केही दिनअघि सार्वजनिक भएको उनको गीत ‘हामीलाई जागिर चाहियो’मा सहकारी ठगी प्रकरण र रास्वपा सभापति रवि लामिछानेलाई लक्षित गरिएको भन्दै उनको चर्को आलोचना र बहिष्कारको माग सामाजिक सञ्जालमा भइरहेको छ ।

गीतमा के छ ?

क्षेत्रीले ल्याएको यस गीतमा देशको वर्तमान अवस्था, बेरोजगारी, भ्रष्टाचार र राजनीतिक विकृतिबारे व्यङ्ग्य गरिएको छ । युवाहरूको मुख्य समस्या ‘जागिर’ को माग गरिएको छ ।देशका समस्यामा नेताहरू किन चुपचाप छन् भनी प्रश्न गरिएको छ । विकास निर्माणमा भएको ढिलासुस्ती र भ्रष्टाचारमाथि व्यङ्ग्य गरिएको गीतमा सहकारी ठगहरूलाई कारबाही नभएकोमा असन्तुष्टि जनाइएको छ । क्षेत्रीसहित सपना मगर,रेणु लामिछाने,प्रमेश घिमिरे,प्रेम वि.के.र सन्देश सुवेदीले स्वर रहेको गीतको शब्द,सङ्गीत र निर्देशन स्वयम् गायक क्षेत्रीले नै गरेका हुन् ।